Өлүөнэ эбэҕэ аналлаах хоһоон күрэҕэ түмүктэннэ

Күөрдэмнээҕи «Ситим» култуура киинэ  “Туойабын Элиэнэм эйигин” диэн хоһоон күрэҕин тэрийэн  ыытта. Кэтэхтэн күрэх от ыйын 2 күнүн – үс үллэр сүүрүктээх иитиллэр Элиэнэ эбэ күнүн көрсө ыытылынна.  

Күрэххэ уопсайа 16 хоһоонньут кытынна. Амма, Нам, Таатта, Бүлүү хоһоонньуттара Өлүөнэ эбэбит туһунан олус истиҥ-иһирэх тыллары суруйбуттар, таптал, махтал тыллары хотоҕостуу субуйбуттар.  Күрэх сүрүн соругунан:

• — Төрөөбүт тыл нөҥүө төрүт түөлбэҕэ, төрөөбүт дойдуга махталы, тапталы тириэрдии;
• — Өлүөнэ эбэни уус-уран тылынан хоһуйуу;
• — Хоһоон тылын чочуйуу, айар талааннары арыйыы;
• — Хоһоону  пропагандалааһын буолла.

Дьүүллүүр сүбэҕэ Ирина Харайданова-Сэгэлдьийэ Чээлэй —  СӨ Суруйааччыларын сойууһун чилиэнэ,  Тамара Лебедева — Покровскайдааҕы 2 №-дээх оскуола  саха тылын учуутала, тылбаасчыт үлэлэстилэр.

Сүбэ маннык түмүгү оҥордо: I Үрдэл —   Илья Васильев-Ылдьаа Хоточчу, Николай Тимофеев-Куола Тылгыны, II Үрдэл —  Елизавета Попова-Бааттаах Кырата, Людмила Тарасова. III Үрдэл — Юлия Винокурова-Петрова, Надежда Лиханова-Чэмэлиинэ буоллулар. Дьүүллүүр сүбэ эр дьон хоһуйууларын ордук бэлиэтээтэ. Чочуллубут тыл-өс, аллитерация, уус-уран тэҥнэбиллэр табыгастаахтык туһаныллыбыттар.

Чочуонай тылларынан Элиэнэ эбэни хоһуйбут күрэх кыттааччыларыгар махталбытын тириэрдэбит. Иитиллэр эбэбит күрүлүү-харылыы аргыый уһуннун, нүөл уутунан хочолорун, быттыктары, быллаардары угуттуу турдун, дьол сайдыы үйэлээх тымыра!

Саргылана САЙЫН