Өлүөнэ эбэни киртитии туһунан иһитиннэриинэн бэрэбиэркэ ыытылынна

Бэҕэһээ Өлүөнэ эбэҕэ сэлээркэ тохтубутун туһунан иһитиннэриинэн өрөспүүбүлүкэтээҕи айылҕа харыстабылыгар сыһыаннаах тэрилтэлэр суһал мунньах ыытан, федеральнай кэтээн көрөр, хонтуруоллуур тэрилтэлэргэ бэрэбиэркэни ыытарга көрдөһөн сурук ыыпыттара.

Ол түмүгэр федеральнай кэтээн көрөр, хонтуруоллуур тэрилтэлэр миэстэтигэр тиийэн бэрэбиэркэ ыыттылар уонна киртийии булуллубатаҕын туһунан иһитиннэрдилэр.

Видеоҕа устууга көрдөрүллүбүт учаастагар, паром туоруур сиригэр уонна эбэ аллараа өттүгэр ууга ньиэп бородууксуйатын тобоҕо уонна суола суох, киртийии чахчыта бигэргэтиллибэтэ диэн СӨ Экологияҕа, айылҕаны туһаныыга уонна ойуур хаһаайыстыбатын министиэристибэтэ иһитиннэрэр.

Оттон Айылҕаны кэтээн көрөр федеральнай управление Саха сиринээҕи салаатын уонна Балык хаһаайыстыбатын федеральнай агентствотын иниспиэктэрдэрэ эмиэ миэстэтигэр ыытыллыбыт бэрэбиэркэ түмүгүнэн, өрүскэ ньиэп тохтубут суолун булбатылар.

Төрөөбүт дойдуларын айылҕатын харыстыыр сэргэх дьон үгүстүк буруйдаахтары быһаарарга көмөлөһөр, ол гынан баран, бу видеоҕа киртийии төрүөтүн уонна күнэ-дьыла, бириэмэтэ, паром нүөмэрэ суруллубатах диэн СӨ Экологияҕа, айылҕаны туһаныыга уонна ойуур хаһаайыстыбатын министиэристибэтин пресс-сулууспата суруйар.

Экология министиэристибэтин үлэһиттэрэ айылҕа сокуонун кэһиини көрдөххүтүнэ, бастатан туран, ханна буолбутун улуус иниспиэксийэлэригэр хамыыһыйаларыгар тута биллэриҥ, видеоҕа устарга күнүн-дьылын, бириэмэтин,  киртийии тахсыбыт сирин чопчу этиҥ диэн көрдөһөллөр.