Өлүөнэ өрүс кыдьымаҕын киллэрэн эрэр

Өлүөнэ өрүскэ Эдьигээн-Күһүүр учаастагар кытылы кыйа муус модьоҕолонон эрэр. Онон чугастааҕы сууккаларга бу учаастакка уста сылдьар кыдьымах муустар баар буолуохтара, диэн Саха сиринээҕи гидрометкиин иһитиннэрэр.

Муус модьоҕолонуута Алдан өрүскэ Томпо оройуонун Хаандыга бөһүөлэгин аттыгар баара эмиэ бэлиэтэнэр. Дьааҥы өрүскэ Уус Куйга аттынан муус турбут.

Эрдэ этиллибитин курдук, быһа холоон алтынньы 16 күнүн диэки Дьокуускай аттынан өрүһүнэн сылдьыһыы сабыллыахтаах. Дьокуускай-Аллараа Бэстээх маршрутунан паром сырыыта алтынньы бүтүөр диэри үлэлиирэ былааннанар. Чиҥ муус туруор диэри өрүһү муус быыһынан устар паромнарынан туоруохтара, олору ыарахан уйуктаах баарсалар арыаллыахтара. Ону кытта өрүһү туоруур сыана үрдүүрэ күүтүллэр.