Өлүөнэ өрүс мууһа Эдьигээн улууһунан устар

Өлүөнэ өрүскэ муус Эдьигээн уонна Кэбээйи улуустарынан устар. Ленскэй уонна Өлүөхүмэ улуустарыгар уу таһыма сууккаҕа 20-70 см үрдээбит, киин улуустарга 10-20 см түһэр. Муус алын кырыыта Эдьигээн бөһүөлэгин аннынан бэлиэтэнэр, уу таһыма 742 см (кутталлаах таһыма 1430см), муус турар.

Үөһээ кырыыта Сангаар бөһүөлэгин аннынан баар, уу таһыма 1052 см (кутталлаах таһым 1150 см), муус бытааннык устар. Амма өрүс сааскы уу-хаар элбэҕиттэн халааннаан Таатта улууһун Чымынаайы уонна Чурапчы улууһун Мырыла сэлиэнньэлэрэ ууга тураллар.

Халыма өрүскэ муус Орто Халыма уонна Аллараа Халыма өрүстэр кыраныыссаларынан устар. Муус алын кырыыта Орто Халыма куоратыттан 319 км аллара – икки улуус кыраныыссатыгар бэлиэтэнэр, хойуутук устар. Халыматааҕы гидропостка уу таһыма 692 см (кутталлаах таһыма 1000 см), муус көтөҕүллүбүтэ бэлиэтэнэр. Муус үөһээ кырыыта Орто Халыма куоратытттан аллара 160 км сиргэ устар. Уу таһыма 900 см (кутталлаах таһыма 1000 см).

Зырянка бөһүөлэгин аннынан уу таһыма 693 см, муус суох. Зырянка пуордун көтөр-түһэр балаһатын 30 %-на ууга турар. Черскэй бөһүөлэгин аннынан уу таһыма 212 см (кутталлаах таһыма 600 см), муус турар, көтөҕүллүбүт. Муус 159 км усталаах, сууккаҕа 5 км сыҕарыйбыт. Березовка сэлиэнньэтин аннынан устар Березовка өрүскэ уу таһыма 1018 см (кутталлаах таһыма 1000 см), мууһа суох.

Үөһээ Дьааҥы оройуонугар Үөһээ Дьааҥы – Баатаҕай учаастагар Дьааҥы өрүс ырбыылаабыта бэлиэтэнэр. Адыаччы өрүс Дьааҥы өрүскэ түһэн, Сайдыы сэлиэнньэтин аннынан сүүрдэн муус хамсааһынын таһаарда. Уу таһыма сууккаҕа 1,5 м үрдээтэ.

Индигиир өрүскэ уу таһыма сууккаҕа 10-40 см үрдээтэ, өрүс үөһээ уонна орто сүүрүгэр муус хамсыыра бэлиэтэнэр, атын учаастактарга муус турар. Муома улууһун Хонуу бөһүөлэгин аннынан уу таһыма 303 см (кутталаах таһыма 600 см), муус хамсаата.