Өлүөнэ өрүс мууһа Иркутскайга Жигалово таһынан хамсаата

Өлүөнэ эбэ  Иркутскай уобалас Жигалово нэһилиэнньэлээх пуунун аннынан эһиннэ. Бу пуун Ленскэй оройуон Витим бөһүөлэгиттэн 1085 км ыраах сытар. Бу туһунан Өлүөнэтээҕи БВУ пресс-сулууспата иһитиннэрэр.

Саха сиринээҕи УГМС эрдэ иһитиннэрбитинэн, өрөспүүбүлүкэ сиригэр-уотугар өрүстэр бары биир тэҥник эрдэ арыллаллара күүтүллэр — 2 сууккаттан 5-6 сууккаҕа тиийэ. Саха сирин кыраныыссатыгар Өлүөнэ мууһа кэлиитин ыам ыйын 2 күнүгэр сабаҕалыыллар, нуорма — ыам ыйын 8 күнүгэр диэн. Дьокуускай аннынан ыам ыйын 13-15 күннэригэр муус устуоҕа диэн суруйаллар.