Өлүөнэ өрүс түөрт улууһунан уонна Дьокуускайынан устар

Хаҥалас,  Мэҥэ Хаҥалас, Нам, Уус Алдан, улуустарынан уонна Дьокуускай куорат сиринэн-уотунан муус устан ааһар.

Бу туһунан өрөспүүбүлүкэ гражданскай көмүскэлин уонна нэһилиэнньэ олоҕор-дьаһаҕар куттал суох буолуутун хааччыйыыга миниистири бастакы солбуйааччы Айаал Вензель иһитиннэрдэ:

—  Муус үөһээҥҥи кирбиитэ Хаҥалас улууһун Иһит нэһилиэгэр, алын кирбиитэ Нам улууһун Фрунзе нэһилиэгэр бэлиэтэннэ.  Манна муус хойуутук устар. Кэбээйи улууһун диэки Алдан өрүс мууһа аһыллан эрэр. Томмот-Батамай учаастагар муус хамсааһына бэлиэтэннэ.

Бүлүү өрүс мууһа Бүлүү уонна Кэбээйи улуустарынан устар. Марха үрэххэ уу таһыма үрдүүр, муус орто тэтиминэн устар.

Яна өрүс мууһа Верхоянскай куоратыгар хамсаан эрэр. Бу учаастакка муус хойуутук устара ыам ыйын 17-19 күннэригэр күүтүллэр.  Манна урукку кэмҥэ 23 чыыһылаҕа муус хамсыыра.

Индигиир өрүс Уус-Ньара эҥэригэр ыам ыйын 19 күнүттэн хамсыаҕа. Урукку сылларга муус ыам ыйын 24 күнүгэр устара.

Халыма өрүскэ муус Зырянка аннынан бытааннык устар. Орто Халымаҕа муус хойуутук устуута ыам ыйын 20-21 күннэригэр күүтүллэр.

Бүгүҥҥү күҥҥэ муус устуутун кэмигэр уу таһыма сарсыарда 8 чаас туругунан кутталлаах таһымтан аллараа турар. Муус хамсааһынынан сибээстээн, кыра суудуналар сырыылара саҕаланыар диэри арыыларга, уу ылар сирдэригэр сырыыны тохтоторго, сэрэхтээх буоларга  сүбэлиибит», — диэн бэлиэтээтэ Айаал Вензель.

Сиһилии https://www.sakha.gov.ru/news/4690 сигэнэн билсиҥ.

СӨ Ил Дарханын уонна Бырабыыталыстыбатын пресс-сулууспата