Өлүөнэ өрүскэ бастакы кыһыҥҥы суол аһылынна

Өлүөнэ өрүскэ бастакы кыһыҥҥы суол аһылынна. Бэнидиэнньиктэн, сэтинньи 24 күнүттэн, Покровскай – Күөрдэм хайысханан  кыһыҥҥы суол үлэҕэ киириитэ көҥүллэннэ, диэн Хаҥалас улууһун дьаһалтатын пресс-сулууспата иһитиннэрэр.

«Сөптөөх күн-дьыл турбутунан уонна бары ирдэнэр тэхиниичэскэй бэрэбиэркэлэр түмүктэммиттэринэн сибээстээн, сэтинньи 24 күнүттэн Покровскай уонна өрүс уҥуордааҕы Күөрдэм сэлиэнньэтин холбуур Өлүөнэ өрүһү туоруур кыһыҥҥы суолунан айан аһылынна», — диэн иһитиннэриигэ этиллэр.

Айан 3 тоннаҕа диэри ыйааһыннаах тырааныспарга көҥүллэнэр.

Санатан эттэххэ, сэтинньи 23 күнүгэр Өлүөнэ өрүскэ паром сырыыта тохтообута. Хатас – Павловскай муус суолун ахсынньы ый бастакы дэкээдэтигэр аһар былааннанар.

Саха сиригэр сүрүн кыһыҥҥы суоллар ахсынньыга аһыллыахтара