Өлүөнэ өрүскэ пассажирдаах теплоход алдьанна

Өлүөнэ өрүскэ Өлүөхүмэттэн Дьокуускайга кэлэн испит, пассажирдаах теплоход алдьанан хаалбыт. Бу туһунан Илин-Сибиирдээҕи тырааныспар борокуратуурата иһитиннэрэр.

Бу быһылаан от ыйын 24 күнүгэр Мэҥэ Хаҥалас улууһун Ороссолуода сэлиэнньэтин аттыгар буолбут. «Ленатурфлот» хампаанньа «Восход-66» теплохода 61 пассажиры илдьэн испит, ону тэҥэ, экипаж 4 чилиэннээх эбит.

Быһылааҥҥа ким да эмсэҕэлээбэтэх. Дьон алдьаммыт теплоходка 6 чаас кэриҥэ олорбуттар.

Онтон киэһэ 9 чаас саҕана икки суудуна кэлэн, биирэ пасажирдары ылбыт уонна иккиһэ алдьаммыт теплоходу состорон илдьибит.

Бу быһылаан түмүгүнэн бэрэбиэркэ ыытыллар. Дьокуускайдааҕы тырааныспар борокуратуурата суудунаҕа куттала суох буолуу быраабылалара төһө тутуһуллубуттарын бэрэбиэркэлиэҕэ.