Өлүөнэ күргэтин тутааччылара киин пилоҥҥа аналлаах коффердамы хомуйууну саҕалаатылар

Саха сиригэр Өлүөнэ күргэтин тутуутун былаһааккатыгар киин пилоҥҥа аналлаах коффердам конструкцияларын хомуйууну саҕалаатылар. Бу үс тутууттан саамай бөдөҥнөрө буолуоҕа: диаметра – 46 м, үрдүгэ – 17,32 м, оттон ыйааһына 2835 туоннаҕа кэриҥэҕэ тиийиэҕэ.

Коффердам иһигэр 284,5 м үрдүктээх пилон тутуллуоҕа. Бу туһунан «ВИС» бөлөх иһитиннэрдэ.

Өрүс сүнньүгэр тирэхтэри тутарга аналлаах кураанах сири үөскэтэр, ууга устар коффердамнары туһаныы Арассыыйаҕа күргэни тутуу уопутугар ураты көстүү буолар диэн «ВИС» бөлөх санатта. Конструкциялар эрэгийиэн килиимэтин уонна гидрологиятын уратыларын учуоттаан оҥоһулуннулар уонна муус хамсааһынын кэмигэр улахан ноҕуруускалары тулуйуохтара. Хомуллубут коффердамы өрүс сүнньүгэр таһаарар туһунан быһаарыы фарватеры чинчийэн уонна Өлүөнэ өрүскэ наадалаах уу таһымын ааҕан-суоттаан баран ылыллыаҕа. Ону тэҥэ хаҥас кытылга бэһис тирэх кутуллар сыбаайаларын тургутарга бэлэмнэнэллэр, ол инниттэн кинилэр бастарын бырайыак бэлиэтигэр диэри кэрдэллэр.

Маныаха маарынныыр үлэлэр төрдүс тирэххэ эрдэ түмүктэммиттэрэ. Аныгыскы түһүмэҕинэн бетону кутуу буолуоҕа, бу ростверктар күргэ сүрүн кэлтэйин ноҕуруускатын тэҥҥэ тарҕатыахтара. Уҥа кытылга үһүс бетон собуотун фундамена оҥоһуллан, монтааһа саҕаланна.

Билиҥҥи туругунан икки кытылга биирдии собуот үлэлиир, кинилэр күүстэрэ үлэ кэҥээн иһэринэн эбиллэн иһэр. Ону таһынан, күргэ уҥа кытылга киирии суолун олоҕо бэлэмнэнэр, онно сотору  буор кутуллуоҕа. Технологическай былаһааккаларга сыбаайаларга аналлаах арматура каркастарын оҥоруу салҕанар – билиҥҥи туругунан 920-тэн 437 устуук бэлэм.

Өлүөнэ күргэтин тутуу бырайыагын «ВИС» бөлөх СӨ Бырабыыталыстыбатын кытта түһэрсиллибит концессия сөбүлэҥин чэрчитинэн олоххо киллэрэр. Холдинг бырайыактааһыҥҥа, үбү-харчыны тардыыга, тутууга уонна эбийиэги үлэҕэ киллэриигэ эппиэтинэстээх. Концессия болдьоҕо 2044 сылга диэри быһыллыбыт, оттон сүрүн тутуу үлэлэрэ 2028 сыл бүтүүтүгэр түмүктэниэхтээхтэр.