Өлүөнэ муостатыгар былааннаммыт 50 сыбаайа турда

Табаҕа бөһүөлэгин таһынан Өлүөнэ өрүһү туоруур муоста тирэҕин анныгар 50 сыбаайаны дьөлө үүттээн туруордулар.

ВИС бөлөх сыл бүтүөр диэри былааннаабыт үлэтин толордо диэн Өлүөнэ муостатын дирекциятыгар иһитиннэрдилэр.

“Тыйыс усулуобуйаҕа хас биирдиитэ 1,5 м эргимтэлээх 10 м уһуннаах 50 сыбаайаны туруордубут. Өлүөнэ муостатын 26 тирэҕин анныгар барыта 920 сыбаайа туруохтаах”, — диэбиттэр Дирекция иһитиннэриитигэр.

Бүгүн өрүс икки кытылынан технологическай былаһааккаларга производственнай сыахтары уонна оробуочайдар олорор бөһүөлэктэрин оҥорууга үлэ салҕанар. Бырайыак «Росдорния» федеральнай тэрилтэ кытаанах хонтуруолугар сылдьар.

Аныгыскы тутар сезоҥҥа бэлэмнэнии үлэ салҕанар, ол саҕана үлэ өрүс үөһүгэр барыаҕа. Онно саамай далааһыннаах үлэ – муоста үс пилонун оҥорууга коффердамнары туруоруу барыаҕа. Тюменнааҕы Стальмост собуот 4500 туонна тимир конструкциятыттан 1163-тын оҥорбут, диэн Ил Дархан, бырабыыталыстыба пресс-сулууспата иһитиннэрэр.