Өлүөнэ муостатын тутуу сүрүн үлэтэ уҥа биэрэккэ ыытыллар

Бэҕэһээ, ыам ыйын 28 күнүгэр, өрөпүүбүлүкэ суруналыыстарын бөлөҕө Өлүөнэ муостатын тутуутун тиийэн анаан көрдө-иһиттэ. 

Үлэ быйылгы кыһыҥҥыттан саҕаламмыт буолан, тутуу учаастактарыгар тутуу матырыйаала эрдэттэн аҕалыллыбыт. Онон Өлүөнэ өрүс икки биэрэгинэн тэтимнээх үлэ бара турар. Бу туһунан тутуу дириэктэрэ Антон Крупнов билиһиннэрдэ.

— Муоста коффердамын тутуута 30% бэлэм. 17,52 м үрдүктээх, 36 м кэтиттээх тимир «буочуканы» туруорууну от ыйын ортотугар диэри бүтэрэргэ былаанныыбыт. Бу үлэ хара уу кэлэр кэмиттэн тутулуктаах. Сүрүн үлэ өрүс уҥа өттүгэр ыытыллар.  Манна производственнай баазабыт, сүрүн тутуу матырыйааллара таҥыллан, иһэрдэн, хомуллан бэлэмнэнэллэр, — диэн бэлиэтиир тутууну салайар дириэктэр Антон Крупнов.

Өлүөнэ өрүс муостатын тутуу тыйыс килиимэттээх усулуобуйаҕа аан дойдуга суох ураты тутуунан буолар.  “Коффердам” диэн өрүс түгэҕэр муоста пилоннарын тутууга кураанах үлэлиир сири оҥорор тимир тутуу.

Уопсай ыйааһыннара –  4,5 тыһыынча туонна. Тутуу бу матырыйаалын “ВИС” бөлөх анал сакааһынан Тюмень куоракка баар “СтальМост” АУо собуотугар оҥорбуттара. Арассыыйаҕа үс пилоннаах канатнай муоста тутуутугар үгүс технология аан бастаан туһаныллар.

— 80-ча сыбаайаны туруордубут. Муоста сүрүн тирэҕин балаҕан ыйыгар туруорарга былаанныыбыт. 2025 сылга үлэ сүрүн түһүмэҕэ былааннаммыта: уҥа кытылга толору кээмэйдээх сири дьөлө үүттээһин, хаҥас кытылга коффердамы таҥыыны түмүктээһин уонна хапытаалынай тирэҕи тутууну түмүктээһин.  Уопсайа үс коффердам уонна үс ханаал тирэхтэрэ тутуллуохтара. Бары наадалаах тимир конструкциялар тутуу учаастагар тиэрдиллибиттэрэ, — диэн бэлиэтээтэ тутуу салайааччыта.

Муоста тутуутун сүрүн үлэтэ — иһэрдии, таҥыы, хомуйуу буолан, тутуу былаһааккатыгар тыас-уус бөҕө. Үлэ күөстүү оргуйар.