Өлүөнэ күргэтин тутуутун былаһааккатыгар өрүһү дириҥэтэр үлэҕэ бэлэмнэнии саҕаланна

«ВИС» бөлөх Өлүөнэ өрүс нөҥүө күргэни тутууга үлэни тэнитэр. Бүгүн коффердамнары туруорарга уонна өрүс ортотунааҕы тирэхтэри оҥорорго учаастактары бэлэмнээһин саҕаланна.

10-с нүөмэрдээх тирэх бастакы коффердама хаҥас кытылга баар 2-с нүөмэрдээх технологическай былаһааккаҕа толору хомулунна, аттыгар иккис – киин коффердамы хомуйуу салҕанар. Ити күргэ саамай үрдүк пилонугар (284 м тахса) ананар. Манна 2834 туонна тимир конструкцияттан 317 туонната хомулунна. Тэҥҥэ 1-кы нүөмэрдээх технологическай былаһааккаҕа арматура каркастарын оҥоруу бара турар, 629 устуукаттан 441 бэлэм.

Күргэ кытыытынааҕы тирэхтэрин тутуу салҕанар. 5-с нүөмэрдээх тирэххэ шпунтовой күрүөлээһин (уопсайа 176,1 тонна) түмүктэннэ, ол котлованы хаһарга кыах биэрдэ. Тэҥҥэ буронабивной сыбаайалар төбөлөрүн быһыы ыытыллар – билигин үлэ 32% толорулунна.

Арассыыйа Бэрэсидьиэнэ Владимир Путин өйөбүлүнэн уонна дойду Бырабыыталыстыбатын быһаарыытынан Өлүөнэ күргэтэ национальнай бырайыакка киирдэ уонна федеральнай үбүлээһини ылбыта. Бырайыагы «ВИС» бөлөх концессионнай сөбүлэһии чэрчитинэн олоххо киллэрэр уонна кыттааччылар бары: Саха сирин Бырабыыталыстыбата, концессионер, үп-харчы өттүнэн партнёр — Сбер, ону тэҥэ бырайыактааччы уонна РОСДОРНИИ эспиэрдэрэ мэлдьи хонтуруоллууллар.

Концессионнай бырайыагы олоххо киллэрии Саха сирин Арассыыйа атын чааһын кытта сылы эргиччи ситимниир саҥа тырааныспар артериятын олохтуурга, өрөспүүбүлүкэ логистическай тиийимтиэтин үрдэтэргэ кыах биэриэҕэ. Өлүөнэ күргэтэ – үс пилоннаах ванталаах күргэ, массыына суолун кытта уопсай уһуна 14,5 км. Бу – аан дойдуга аналога суох ураты эбийиэк: кыһын тымныы, муус хамсааһына уонна халаан уута күүстээх, матырыйааллары тиэйии уустук, ирбэт тоҥ уонна сир хамсааһына элбэх. Бырайыактыырга Владивостокка тутуллубут Босфор Восточный уонна Золотой Рог күргэлэрин  уопута учуоттанна. Бу уопут уонна Саха сирин килиимэтин уратылара Өлүөнэ күргэтин бырайыактааһын төрүөтүнэн буоллулар.

Бырайыак салгыы федеральнай өйөбүлү ылар. Быйыл тохсунньуга федеральнай бүддьүөттэн 1,3 млрд солкуобай көрүлүннэ. 2025–2030 сылларга суол үлэтин дьаһалларын чэрчитинэн, Өлүөнэ күргэтин тутууга уопсайа 43 млрд солкуобай көрүллэр. Үлэ «Олоххо аналлаах инфраструктура» национальнай бырайыак чэрчитинэн ыытыллар.

«Өрөспүүбүлүкэ киэҥ сирин ситимниир уонна федеральнай тырааныспар ситимигэр тахсар туһугар үлэбитин салгыыбыт. Өлүөнэ күргэтин тутуутун актыыбынай фаазатын бастакы сылыгар үчүгэй тэтим ылылынна. Өлүөнэ уҥа кытылыгар тирэхтэр фундаменнара оҥоһуллар. Хаҥас кытылга күргэ тирэхтэригэр аналлаах бастакы коффердам хомулунна. Маннык технология күргэ тутуутугар аан бастаан туттуллар. Күргэ 26 тирэҕиттэн бастакыта тутулунна», — диэн СӨ Ил Дархана Айсен Николаев бэлиэтээбитэ. Сиһилии: https://www.sakha.gov.ru/news/26264