Өлүөнэ мууһа Ленскэйгэ ыам ыйын 6 күнүгэр устара сабаҕаланар

Саха сирин үгүс өттүгэр ыам ыйа хаһааҥҥытааҕар даҕаны сылаас буолан, өрүстэр икки-үс хонук эрдэ эстэллэрэ сабаҕаланар. Күнү-дьылы кэтээн көрөр сулууспа сабаҕалааһынынан, салгын орто температурата нуорматтан үрдүк буолара күүтүллэр.

Онон быйыл Өлүөнэ өрүс Ленскэй улууһугар ыам ыйын 6 күнүгэр, Өлүөхүмэ, Хаҥалас улуустарыгар ыам ыйын 10, Дьокуускай куоракка уонна Нам улууһугар ыам ыйын 15-18 күннэригэр, Кэбээйи улууһугар ыам ыйын 20 күнүн диэки эстэр туруктаах.

Алдан, Бүлүү өрүстэр уонна Амма алын өттө 1-3 суукка нуорматтан эрдэлээн, ыам ыйын иккис декадатыгар эстиэхтэрэ.

Саха сирин хоту уонна хотугулуу-илиҥҥи өрүстэригэр муус ыам ыйын үһүс декадатыгар уонна бэс ыйын саҥатыгар, оттон Үөһээ Халыма улууһун Зырянка аннынан Халыма өрүс эрэ ыам ыйын иккис декадатыгар эстэллэрэ күүтүллэр.

Уу таһыма орто уонна онтон эрэ арыый үрдүөн сөп диэн сабаҕалааһын баар. Орто Халыма улууһун Зырянка – Орто Халыма учаастактарыгар Халыма өрүс үрдээн кутталлаах бэлиэҕэ тиийиэн сөп.

Оттон харыы ханна тахсыан сөбө ыам ыйыгар хайдах күн-дьыл турарыттан көстүө. Өрүс эстэр кэмигэр аһара сылаас күннэр турдахтарына, намыһах сирдэргэ турар нэһилиэнньэлээх пууннар ууга барыахтарын сөп.

Хас да сыллаах кэтээн көрүү түмүгүнэн, Өлүөнэ өрүскэ Ленскэй, Өлүөхүмэ, Хаҥалас, Дьокуускай куорат, Нам уонна Кэбээйи улуустарыгар, оттон Алдан өрүскэ Уус Алдан улууһугар, Халыма өрүскэ Үөһээ Халыма уонна Орто Халыма улуустарыгар харыы тахсыан сөп диэн Өлүөнэ тардыытынааҕы уу салалтата сабаҕалыыр.