«Өлүөнэ очуостара» национальнай паарка камератыгар сэдэх көтөр оҕото уһулунна

Буотама үрэх төрдүгэр туруоруллубут камера хайа тыҥырахтаах көтөрүн бииһин ууһугар киирсэр көҕүллээх кыырт (хохлатай осоед) оҕотун устубут.

Видеоҕа көтөр оҕото толору көстүбэт, ол эрээри минеральнай туустаах аһылыкка (кормушкаҕа) чугаһыыр кэмигэр төбөтө эрэ көстөр.

Көҕүллээх кыырт бу сиргэ таарыйан эрэ ааһар көтөрүнэн биллэр. Бу көтөр бүтэһигин 2023 сыллаахха бэлиэтэммитэ, ол иннинэ кинини өссө көрө иликтэрэ диэн «Өлүөнэ очуостара» национальнай паарка дириэксийэтэ иһитиннэрэр.

Ол эрээри, көтөр оҕото манна көстөн ааһыыта, Буотама үрэх төрдүгэр  көҕүллээх кыырт уйаланыыта, олохсуйуута саҕаламмытын туоһулуон сөп. Бу паарка территориятыгар бу көрүҥ ууһууругар табыгастаах усулуобуйалар үөскээбиттэрин көрдөрөр.

Паарка научнай үлэһиттэрэ сыл ахсын орнитологическай чинчийиилэри ыыталлар, ол маннык уларыйыылары кэтээн көрөргө кыаҕы биэрэр.

Видео судаарыстыбаннай иниспиэктэр Роман Широких устуута