«Өлүөнэ очуостара» национальнай паарка тэриллиитигэр наука оруолун туһунан ырыттылар

Быйыл “Өлүөнэ очуостара” айылҕа национальнай паарката 30 сыллаах үбүлүөйүн бэлиэтиир.

Онон бу күннэргэ тэрилтэ салалтата федеральнай статуһу ылыаҕыттан биэс сыллаах үлэ түмүгүн таһаарар.

Ил Дархан Айсен Николаев “Өлүөнэ очуостара” национальнай паарка Саха сирин символа эрэ буолбакка, ЮНЕСКО нэһилиэстибэтин эбийиэгэ буоларын быһыытынан аан дойду баайа-дуола (достояние) буолар диэн бэлиэтээбитэ.
Бүгүн “Арассыыйа — мин дойдум” историческай түмэлгэ “Өлүөнэ очуостара” национальнай паарканы тэрийиигэ наука оруолун туһунан “төгүрүк остуол” буолла.

Онно Москваттан кэлбит Арассыыйа наукаларын академига, Бүтүн Арассыыйатааҕы палеонтологическай уопсастыба бэрэсидьиэнэ Алексей Розанов  кыттыыны ылла.

— Биэс сыл устата «Экология» национальнай бырайыак чэрчитинэн үгүс суолталаах бырайыак ​​олоххо киирдэ: «Медвежьи Острова» заповедник сиригэр-уотугар араас хайысхалаах үлэлээх хаһаайыстыбалар ситимнэрин тэрийии, ол иһигэр  иниспиэктэрдэр,  ыалдьыттар олорор дьиэлэрин, баанньыктары уо.д.а. дьон туһугар үлэлиир тутуулары олоххо киллэрии. “Кыталык” национальнай пааркаҕа эмиэ итинник ситимнэри үлэлэтиэхпит. Бу дьаһал сэдэх көрүҥнээх харамайдары харыстыырга уонна научнай чинчийиини ыытар усулуобуйаны тэрийиигэ туһуланар, — диэн бэлиэтээтэ Национальнай паарка дириэктэрэ Аркадий Семенов “төгүрүк остуол” аһыллыытыгар.

Тэрээһиҥҥэ биллиилээх учуонайдары кытта үүнэр көлүөнэ — кыраайы үөрэтээччи Прокопий Ноговицын  салайар “Эллайаада” оскуола оҕолорун эспэдииссийэтин чилиэннэрэ кыттыыны ыллылар.

Бүгүн “Өлүөнэ очуостара” айылҕа национальнай паарката 30 сыллаах үбүлүөйүгэр анаммыт анал быыстапка үлэтин саҕалаата. Манна учуонайдар үлэлэрэ, хайа боруодаларын эспэнээттэрэ, Айылҕа национальнай паарката ЮНЕСКО эбийиэгинэн буоларын туоһулуур сэртипикээт уо.д.а. олус кэрэхсэбиллээх эспэнээттэр турдулар.

Быыстапка дьон билиитигэр-көрүүтүгэр анаан атырдьах ыйын 27 күнүгэр диэри туруоҕа.