Өлүөнэ очуостарыгар -50 кыраадыска «Азия оҕолоро» оонньуу уотун уматтылар

Бүгүн Өлүөнэ очуостарыгар -50 кыраадыс тымныы түһэн турдаҕына, «Азия оҕолоро» II кыһыҥҥы аан дойдутааҕы успуорт оонньууларын уотун уматтылар.

Уоту олунньу 23 – кулун тутар 5 күннэригэр ыытыллар күрэхтэһиилэргэ анаан Кемеровскай уобаласка илдьиэхтэрэ.
Саха норуотун үгэһин быһыытынан сиэр-туом алгыстан саҕаланна. Аал уоту Өлүөнэ очуостарын тэллэҕэр уматан баран анал капсулаҕа уктулар.
Уоту аан бастаан СӨ Ил Дарханын уонна Бырабыыталыстыбатын дьаһалтатын салайааччыта Георгий Михайлов тутта. «Биһиги аан бастаан -50 кыраадыстаах тымныыга ытык сирбитигэр уоту уматтыбыт. Сирбит-дойдубут иччилэрэ биһиги өрөспүүбүлкэбитин уонна Кемеровскай уобалаһы араҥаччылыы сырыттыннар», – диэтэ кини.
Итини этэн туран, «Азия оҕолоро» II кыһыҥҥы аан дойдутааҕы успуорт оонньууларын кэмитиэтин бэрэсидьиэнигэр Владимир Максимовка туттарда.
«Аал уот сүүһүнэн килэмиэтир сири баран, олунньу 25 күнүгэр «Азия оҕолоро» II кыһыҥҥы оонньуулар Кузбасс сиригэр саҕаламмыттарын бэлиэтиэ. Уоту арыаллааччыларбыт харыстаан уонна чиэстээхтик илдьэн, оҕо успуорда сайдарын туһугар туһуламмыт бырайыак салҕанарын бэлиэтинэн буолуоҕар баҕарабын», – диэтэ Максимов.
Уоту уматыы сиэригэр-туомугар Кемеровскай уобалас, Арассыыйа Олимпийскай кэмитиэтин, бэрэстэбиитэллэрэ, Хаҥалас улууһун салалтата, успуорт миниистирэ Леонид Спиридонов, «Азия оҕолоро» аан дойдутааҕы оонньуулар посоллара Анна Богалий кытыннылар.
Кемеровскай уобалас губернатора Сергей Цивилев аатыттан кини солбуйааччыта Сергей Алексеев тыл эттэ. «Биһиги оонньуулар үрдүк таһымнаахтык ыытылларын, спортсменнар кыайыы көтөллөнөн, сүргэлэрэ көтөҕүллэн баралларын туһугар кыаллары барытын оҥоро сатыахпыт. Дьиҥ бу оонньуулар элбэх спортсмеҥҥа улахан успуорка тахсалларыгар тирэҕинэн буолар», – диэн тоһоҕолоон бэлиэтээтэ кини.
Кыһыҥҥы оонньуулар Кемеровскай уобалас түөрт куоратыгар олунньу 23 – кулун тутар 5 күннэригэр ыытыллыахтара. Саха сирин сүүмэрдэммит хамаандатыгар 62 спортсмен киирэн дойдуларын чиэһин көмүскүөхтэрэ. Кинилэр 10 көрүҥтэн 6-гар – хайа хайыһарын уонна хаҥкы, хайыһарынан сүүрүү, сноуборд, фигурнай хаҥкы уонна хоккей көрүҥэр киирсиэхтэрэ.

Андрей Сорокин хаартыскалара