Өлүөнэҕэ муус барар кэмигэр пассажирдары таһыы тэриллиэҕэ

Саха сиригэр муус бара турар кэмигэр пассажирдары таһыы тэриллиэ. Бу туһунан СӨ Тырааныспарга уонна суол хаһаайыстыбатын министиэристибэтэ иһитиннэрэр.

Биэдэмистибэҕэ иһитиннэрбиттэринэн, билигин пассажирдары Дьокуускай  куорат 204-с түөлбэттэн (“Намыв” ыстаансыйа) Аллараа Бэстээххэ диэри биирдиилээн урбаанньыттар 26 “подушканан” (СВП) уонна аэроботунан таһаллар.

Муус күүскэ бара турар кэмигэр өрүһү туорааһын олус уустук усулуобуйаҕа ыытыллыаҕа. Кылгас кэмҥэ “подушканан” туорааһын сыаната 5 тыһыынча солкуобайга тиийиэҕэ.

Гидрологическай балаһыанньа мөлтөөтөҕүнэ, «Полярнай авиалиниялар» авиахампаанньа Ми-8 бөртөлүөттэринэн Дьокуускайтан Мэҥэ Хаҥалас улууһун Павловскай сэлиэнньэтигэр диэри Маҕан – Павловскай – Маҕан маршрутунан пассажирдары таһарга бэлэм. Биир пассажир өрүһү туоруур сыаната 6,5 тыһ. солк., 2-тэн 12-гэр диэри саастаах оҕолорго 50% чэпчэтиилээх буолуоҕа.

Авиабилиэттэри Маҕан аэропордугар баар «Полярнай авиалиниялар» АХ каассатыгар (төл. 406-036) уонна “Павловскай” бөртөлүөт түһэр былаһааккатыгакр атыылыахтара.

Санатан эттэххэ, Дьокуускай таһынан өрүс аһыллыыта ыам ыйын 12-15 күннэригэр буолара сабаҕаланар.