Муус барыыта Булуҥ оройуонугар тиийдэ

Бүгүн Өлүөнэ эбэ мууһа Булуҥ оройуонугар тиийдэ.

Муус барыытын  үөһээ кытыыта Эдьигээн оройуонун Дьардьаан гидропуоһуттан үөһээ 20 км баар, уу таһыма 1720 см (ыксаллаах таһым 2545 см.). Муус барыытын аллараа кытыыта – Булуҥ оройуонун Сииктээх сэл. таһыгар. Бу туһунан Саха сирин Бырабыыталыстыбатын бэрэссэдээтэлин бастакы солбуйааччы Дмитрий Садовников брифиҥҥэ иһитиннэрдэ.

Дьааҥы эбэҕэ муус Усуйаана оройуонугар устар. Үөһээ кытыыта Казачье сэл. үөһээ 50 км баар, аллараа кытыыта сэлиэнньэттэн 15 км аллараа. Уу таһыма — 807 см (ыксаллаах таһым 1450 см).

Индигиир эбэҕэ муус Абый оройуонунан ааһар. Үөһээ кырыыта Белай Гораттан үөһээ 100 км баар.

Халымаҕа муус Орто Халыма оройуонунан устар. Үөһээ кытыыта Орто Халыма куораттан 170 км аллараа бэлиэтэнэр, аллараа кытыыта – куораттан 310 км аллараа.

“Уопсайынан ыллахха, 2025 сыллааҕы сааскы халаан уута этэҥҥэ ааһа турар. Муус барыытын кэмигэр өрөспүүбүлүкэ өрүстэригэр суһаллык тиийэр бөлөхтөр тэриллибиттэрэ. Соруктары уонна кыһалҕалаах боппуруостары тута быһаарабыт”, — диэтэ Дмитрий Садовников.

Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата

Сиһилии: https://www.sakha.gov.ru/news/5212