Эмиэ күүстээх магнитнай буурҕа түстэ

Бу күннэргэ Сиргэ эмиэ күүстээх магнитнай буурҕа түстэ диэн бэлиэтииллэр. Учуонайдар этэллэринэн, магнитнай буурҕа күүһэ G3+ баалга тиийбит (муҥутуур 5 баалтан). 

РАН Космическай чинчийиилэрин Күн астрономиятын лабораторията иһитиннэрбитинэн, бэҕэһээҥҥиттэн ыла магнитнай буурҕа бэлиэтэнэр. Бүгүн G3+ баалга тиийэ күүһүрбүт. Маннык күүстээх буурҕа бэс ыйын 1 күнүгэр буолбута, онно Күҥҥэ улахан эстиилэр буолбуттара уонна Күн «тыала» чопчу Сиргэ тиийэн кэлбитэ.

Билигин эмиэ Күн «тыала» Сиргэ кэллэ. Планета хотугу эргимтэтинэн дьүкээбиллэр суһумнууллар. Ордук Канада, Аляска үрдүнэн дьүкээбил оонньуоҕа, Саха сирин хотугу улуустарыгар да көстүөҕэ. Бу иннинээҕи күннэргэ Күҥҥэ эстиилэр буолбуттара эрээри, учуонайдар Сиртэн халты барыа, куйаарга тарҕаныа диэн эрэммиттэрэ. Ол эрээри, эстии плазматын Күн «тыала» хомуйан аҕалан, Сиргэ «бэлэхтээтэ». Бу маннык күүстээх буурҕа араадьыйа, спутник сибээһигэр, космическай аппарааттар үлэлэригэр кэһиллиилэри таһаарыан сөп.