Эмис олохтоохторо долгуйа көрдүлэр

Аатырбыт Саһыл Сыһыы муустаах оборуонатын 100 сылыгар, Амма улууһугар — Дойдуга бэриниилээх буолуу, устуоруйа нэһилиэстибэтин сылыгар анаан умнуллубат бэртээхэй тэрээһин буолла.

Бу туһунан уопсастыбаннай кэрэспэдьиэн Прасковья Бубякина иһитиннэрдэ:

—Саха Күөрэгэйэ — Екатерина Захарова аатынан Эмис нэһилиэгин култууратын киинин “Эйгэ” театральнай бөлөҕүн толоруутугар “Саһыл Сыһыы” дырааманы дьон-сэргэ улаханнык долгуйан көрдө. Туруорааччы режиссер — Амматааҕы «Сир симэҕэ» СӨ норуодунай кэлэктиибин салайааччыта, РФ уопсай үөрэхтээһинин бочуоттаах үлэһитэ, Амма нэһилиэгин бочуоттаах олохтооҕо Марианна Ефимова. Бөлөх салайааччылара, култуура бэтэрээннэрэ, туйгуннара — Матрена Владимирова, Наталья Константинова, култуура киинин дириэктэрэ Анжелика Иванова, уус-уран салайааччы Игорь Болтунов, Анна Удина, Тамара Левина, музыка ааптара Альберт Третьяков, костюмердар Анфиса Федорова, Мотрена Аржакова нэһилиэк олохтоохторун уонна оскуола оҕолорун түмэ тардан, улахан үлэни оҥорбуттар. 

Иван Строд оруолун Александр Ларионов, Анатолий Пепеляевы — Игорь Болтунов, Карл Байкаловы — Анатолий Михайлов, Былатыан Ойуунускайы — нэһилиэк баһылыга Прокопий Бубякин, Александр Кармановы — Иосиф Петров, Сүөдэр, Маарыйа оруолларын Авдей, Мотрена Тимофеевтар, Вишневскайы — Андрей Афанасьев, Куликовскайы — Илья Кириллин, барыта түөрт уонча артыыс оруолларын итэҕэтиилээхтик толордулар. Көрөөччүлэр ытыстарын тыаһын харыстаабатылар.

Олохтоох артыыстарбыт салгыы ахсынньы 15 күнүгэр Аммаҕа Федот Потапов аатынан норуот айымньытын дьиэтигэр дырааманы үрдүк таһымнаахтык көрдөрдүлэр, дьон-сэргэ сэҥээриитин ыллылар. Дьэ, бу курдук дойдубут устуоруйатын өрө тутан, кэнчээри ыччакка тиэрдэн үйэтитэргэ үлэлэһиэҕиҥ«, — диэтэ.

Хаартыскаларга Альберт Третьяков түһэриилэрэ