Эмискэ Е.А.Захарова-Саха Күөрэгэйин аатынан култуура киинэ аһылынна

Ахсынньы аан-даам тымныытын аахсыбакка, Эмис нэһилиэгэр бастакы таас тутуу – элбэх хайысхалаах култуура киинэ үлэҕэ киирэр үөрүүлээх күнэ буолла.

Олохтоохтор бука бары түмсэн бу бэлиэ күнү уруйдаатылар, ыраахтан-чугастан ыалдьыттар тоҕуорустулар. Уонча сыллааҕыта аам-даам тымныы сатыылаан турар кэмигэр саҥа кулууп сыбаайатын түһэрии үөрүүлээх чааһа үрдүк үөрүүгэ, дьон сүргэтэ көтөҕүллэн ыраахтан, чугастан дьон тоҕуоруһа мустан ааспыта. Баһылык Илья Пестерев олохтоохтортон санааларын истэн баран, тутуубут үйэлээх буоллун диэн таас тутууга көспүтэ. Тутуу болдьоҕо төһө да уһаатар үлэҕэ киирбитин кэлбит дьон бэлиэтээтилэр. Бу тутууну 2020 сылтан баһылыктыыр Прокопий Бубякин ситэрэн-хоторон быйыл үлэҕэ киирэрин ситистэ. Эбийиэк аһылларын туоһулуур аалай лиэнтэ быһылынна, алгыс сиэрэ-туома оҥоһулунна, эҕэрдэ тыллар биир-биир этиллэн, мустубут дьон ытыс таһыныылара сэлээбэккэ тыаһаата.

СӨ Култуураҕа уонна духуобунай сайдыыга миниистирин бастакы солбуйааччыта Афанасий Ноев, Амма улууһун баһылыга Степан Кузьмин, нэһилиэк баһылыга Прокопий Бубякин эҕэрдэ тылларын эттилэр, эбийиэк тутуутугар үлэлээбит, көмөлөспүт дьоҥҥо наҕараадалары туттардылар. Үөрүүлээх күҥҥэ урукку кэмҥэ кулууп дириэктэринэн үлэлээбит Наталья Константинова бииргэ үлэлээбит кэллиэгэлэригэр Прасковья Новиковаҕа, Октябрина Захароваҕа, киномеханик Татьяна Николаеваҕа 10 000 солкуобай харчы бэлэх туттаран дьонун соһута үөртэ. Киин библиотечнай тиһик дириэктэрин солбуйааччы Светлана Макарова, профсоюз председателэ Туйаара Новикова олохтоох бибилэтиэкэҕэ эҕэрдэ суруктарын, харчынан бэлэхтэрин туттардылар. Дьокуускайтан биир дойдулаахтарбыт Андрей Захаров, Василий Захаров, Анастасия Захарова Саха сирин искусствотын диэйэтэлэ Лира Габышева кинигэлэрин бэлэхтээтилэр. Онно эбии “Көлүкэчээн”, “Далбар Хотуннар” ансаамбыллар стеллаж бэлэх ууннулар. Эҕэрдэ ырыаны Суорун Омоллоон аатынан Опера уонна балет тыйаатырын артыыската, эмистэр сиэммит Екатерина Захарова саха норуотун тапталлаах ырыаһыта Екатерина Захарова-Саха Күөрэгэйэ “Кэҕэ” диэн ырыатын кэрэ куолаһынан ыллаан дьоллоото.

Кулууппут аһыллыытыгар Российскай Федерация үтүөлээх артыыската Анна Дьячковская, Алтантан Мичил Пахомов, Екатерина Захарова аймаҕа Петр Никифоров, Мэҥэ Хаҥалас Төҥүлүтүттэн Галина Стручкова, Дьокуускайтан Екатерина Новикова-Дьулуура, Татьяна Бандерова уонна бэйэбит дьоммут – нэһилиэк олохтоохторун күүһүнэн бэртээхэй кэнсиэр көрдүбүт.

Бу дьоро күҥҥэ тиийиэххэ диэри Е.А. Захарова-Саха Күөрэгэйин аатынан култуура киинин кэлэктиибэ олбуорун ыраастаан, дьиэ иһин сууйан-тараан, кырааскалаан, өрөмүөннээн, түүннэри үлэлээн кэмигэр бэлэм оҥордулар. Сыана бүрүөһүнүн, түннүк сабыыларын эмиэ түүннэри иистэнньэҥ эдэр ийэлэрбит Мирослава Ноговицына, Евгения Новикова тиктилэр.

Онтон киин саалата кэрэ буоларын уус уолбут Данил Тимофеев ситистэ. Сыананы Андрей Григорьев оҥордо. Кэнсиэр көрөр саалабыт сымнаҕас кириэһилэлэрдээх. Ити курдук күүтүүлээх дьиэбит аһылларыгар кулууп, дьаһалта үлэһиттэрэ, нэһилиэк тиэхиньикэлээх эр дьоно, уустарбыт, тэрилтэлэр бары түмсэн үлэлээтилэр. Түмүктүүр үлэни бэдэрээтчит Машрабали Шарипов үлэһиттэрэ суобастаахтык оҥорбуттарын олохтоохтор бэлиэтээтилэр.

Бибилэтиэкэр Прасковья Бубякина.