Эмис кырдьаҕастара сэргэх дьон

Бу күн анныгар эн төһө да уһуннук олорбутуҥ иһин сарсыҥҥы саамай үтүө сарсыардаҕар дьулуһарыҥ тохтуо суоҕа (Амма Аччыгыйа), диэбиттии Эмис нэһилиэгин аҕам саастаах ытык дьонноро нэһилиэкпит, дьиэ кэргэммит туһа диэн күннэтэ түбүгүрэр сэргэх дьон.

Дьиэтээҕи түбүк хаһан да бүппэт, күннэтэ үүнэн иһэр. Онно эбээлэр, эһээлэр улахан оруолу ылаллар, төһүү күүс дьон. Ону таһынан нэһилиэк уопсай дьыалатыгар тэҥҥэ быһаарсар, сүбэ-ама биэрэр, көмө-тирэх буолаллар. Билиҥҥи буола турар анал байыаннай эппэрээссийэҕэ харчынан, анал харысхалларынан, алгыстарынан, сылаас таҥастарынан уо.д.а. көмөнү туора турбакка тэбис-тэҥҥэ кыттыһан иһэллэр. Онтон субуотунньуктарга, култуура, успуорт тэрээһиннэригэр икки илиилэрин ууммутунан кыттан көмүс кылааттарын киллэрэллэр. Бу биһиги эрэ нэһилиэккэ буолбатах, хас биирдии нэһилиэктэргэ, куораттарга баар тутаах араҥа дьон буолаллар.

Кулун тутар ый 23 күнүгэр 25 буолан Суола үрэх сүнньүгэр олорор нэһилиэктэр (Хайахсыт, Өлөчөй, Бүтэйдээх, Алтан, Сатаҕай, Эмис) бэтэрээннэрин сыллата ыытыллар күрэҕэр Чурапчы Хайахсытыгар сэттэ көрүҥ күрэххэ кыттан кэлбиппит. Дуобакка, остуол тенниһигэр, хабылыкка, хаамыскаҕа ситиһиилэнэн кэлбиппит. Тарас Лукич Тарасов баһылыктаах Хайахсыт нэһилиэгин общественнай бөлөхтөрө, олохтоохторо биэс нэһилиэк дьонун наһаа сиэдэрэй, баай остуоллаах эбиэттээх ыалдьыттарын олус үчүгэйдик көрсүбүттэригэр олус сөҕө-махтайа кэпсиибит.

Муус устар ый 2 күнүгэр Дьокуускай куоракка Улуу Кыайыы 80 сылыгар, Василий Назарович Чемезов Саха АССР наукатын үтүөлээх деятелэ, 1941 — 1946 сс үөрэҕирии миниистиринэн үлэлээбит, учуонай, реформатор төрөөбүтэ 110 сылыгар, норуот тапталлаах, уһулуччу талааннаах ырыаһыт Саха драматическай, академическай тыйаатырын артыыһа Екатерина Афанасьевна Захарова — Саха Күөрэгэйэ төрөөбүтэ 105 сылыгар аналлаах улууспут бэтэрээннэрин Сэбиэтин салайааччыта Мария Романовна Захарова көҕүлээһининэн Эмис күннэрин олохтоохтор бары, Эмистэн төрүттээх атын сиргэ олорор биир дойдулаахтарбыт бары саба түһэн бэрт киэҥ далааһыннаахтык ыытыллыбыта. Нэһилиэк Сэбиэтин депутата, үһүс көлүөнэ оскуолатын салайааччыта Наталья Константинова идиэйэтинэн аҕа дойду сэриитин кыттыылаахтарын, тыыл-үлэ бэтэрээннэрин кэриэстээн оҕолоро, сиэннэрэ “Соһуччу бэлэх” сүүйүүгэ бириис туруоран бар дьону үөрдүбүттэрэ. Сүүйүүнү туруорбут, сүүйүүнү ылбыт даҕаны дьон үөрүүлэрэ кэлэр сылларга кэрэ кэпсээн буоларыгар олох саарбахтаабаппын. Бу күҥҥэ биһиги кырдьаҕастарбыт олох туора турбатахтара “Эмис кэскилэ” форумҥа, сэргэх кэнсиэргэ актыыбынай кыттыылаах буолбуттара.

Муус устар ый 15 күнүгэр улууспутугар Улуу Кыайыыбыт 80 сылыгар аналлаах “Кэрэ саас” аҕам саастаах дьоҥҥо күрэххэ вальс үҥкүүгэ уонна ансамблевай ырыа толоруутугар “Кэрэли” үҥкүү бөлөҕө (салайааччы Светлана Куприянова) уонна ансаамбылынан ырыаҕа “Далбар Хотун” (салайааччы Наталья Константинова), “Көлүкэчээн” (салайааччы Ольга Михайлова) ансаамбыл буолан көхтөөхтүк кыттан, анал аат ылан, улууспутугар Кыайыы күнүн ылар улахан тэрээһиҥҥэ кыттар путевка тутан үөрэн кэлбиппит.

Бу маннык айаннарга Федор Неустроев, Вячеслав Гаврильев дьаһалта суоппара массыыналарынан сылдьан кэллибит. Уолаттарга махталбыт улахан.

Онтон биһиги нэһилиэкпитигэр биир тыыл бэтэрээннээхпит, Евдокия Егоровна Пестерева. Быйыл 90 сааһын бэлиэтээбитэ. Кулууппутугар биэчэр тэрийбитэ. Евдокия Егоровна хас биирдии кэнсиэрдэргэ кэрэ куолаһынан көрөөччүлэри үөрдэр кэрэ киһибит.

Сэрии сылын оҕолоро онуолар. Оонньооботох оҕо саастаах, колхуос, сопхуос, араас салааҕа туруу үлэһиттэрэ, билигин харыстабыллаах ытык дьоммут этэҥҥэ эрэ олордуннар. Кинилэр олохторо биһиги историябыт, кэлэр кэскилгэ кэрэ кэпсээннэрбит.

Эмис нэһилиэгин бэтэрээннэрин Сэбиэтин
салайааччыта Прасковья Бубякина