Эмкэ эмиэ туһаналлар

Саха дьоно-сэргэтэ тиити оттукка, тутууга эрэ буолбакка, эмкэ эмиэ туһаналлар.

Тиит мутукчатыгар бэс ыйын саҕаланыытыттан атырдьах ыйа бүтүөр диэри С битэмиин муҥутуур элбэх мунньуллар. Ол иһин ити кэмҥэ хомуйуллар. Мутукчаны үксүн сыыҥка утары уонна битэмиин курдук туһаныллар. Сымалатын уонна хатырыгын оргутан, ис тэһэҕэс ыарыытын эмтииллэрэ биллэр. Мутукчалаах лабаанан сүһүөх дьарҕатыгар ванна оҥостоллор.

Макаров А.А. суруйарынан, тиит лабаатын икки-үс  күн устата тохтоло суох оргутан, түгэҕэр хаалбыт хойуутун (осадок) төбө, сүрэх, быар, бүөр ыарыытыгар, баралыыска, ревматизмҥа, энцефаликка туттуллар.

Хатырыгын анныгар баар үрүҥ субатынан араас бааһы, искэни (нарывы), кутургуйаны саба баайан оһоруохха сөп. Кытаатан хаалбыт сымалатын (сера) хомуйан, маарылаҕа, таҥаска суулаан, ыарыктаан баран оргутуллар. Оргуйдаҕына серата уу үрдүгэр дагдайан тахсар, бөҕө-сыыһа таҥаска хаалар. Онтон ууну сойутуллар, кытааппыт сераны ылан ыас оҥостон ыстаатахха, тиис ыраастанар, бөҕөргүүр, аһыыр баҕаны көбүтэр, ас буһарыытын тупсарар.

Клара, Петр Токумовтар «Төрөөбүт дойдубут эмтээх үүнээйилэрэ» кинигэлэриттэн.

«Бичик» («Айар») кинигэ кыһата, 2008 с.