«Эмп курдук иһэбит дииллэр»

Бүгүн – Сылгыһыт күнэ! Ол курдук, 2016 с. СӨ Ил Дархан ыйааҕынан өрөспүүбүлүкэҕэ Сылгыһыт күнүнэн биллэриллибитэ. Быйыл тохсунньу ыйга “Саха сирэ” хаһыакка “Биэни ыабытым уонча сыл буолла” диэн биэни кыһыннары ыан, кымыс оҥорор Бүлүү улууһун 1 Күүлэт олохтооҕо Иван Иванович Тутукаров  туһунан суруйан турабыт.

Сылгыһыт күнүнэн Уйбаан Тутукаарап билигин туох сонуннаах олорорун сурастыбыт.

— Тыа олоҕо аар айылҕа сокуонунан аа-дьуо баран иһэр. Хаар кытаатан, сылгы аһылыкка киирэр. Биэбин ыы сылдьабын, үүтэ кыччаан эрэр. Оҕотун хамнатара чугаһаата быһыылаах. Бу ыйынан тохтотуом. Хаһыакка тахсаммын куруук ылар хас да килийиэннэнним. Биэни ыаһын олох кыайан сырдатылла илик салаа эбит. Бэл, манна хаһыаттан биллибит дэһэллэр. Ити Масаха Мэхээс курдук биир эмит киһи хайдах ыырын, кымыс оҥорорун туһунан күн аайы кэпсиирэ буоллар, баҕар, тарҕаныа эбитэ буолуо. Килийиэннэрим  махтаналлара сүрдээх: “Эмп курдук иһэбит дииллэр”. Инньэ дииллэрин киһи үөрэ истэр.

Биэбин күнүс ыан баран, үөрүн кытта ыытан уулатабын.

Убаһабын биирдэ таһаара сылдьыбытым. Таһынан кэлэн эмэн, бырааба быстан турар. Уулата ыытарбар тастан сибээһэ суох кыра далга хаайабын. Эбиэскэ үөрэнэн ааттаах үчүгэй. Тута сүүрэн кэлэр. Сарсыарда арааран баран улахан уулаах биэлэри уонна тыйын кытта аһатабын.

Атыыр арыый хойукку уулаахтары кытта таска турар. Күнүс барыларын таһаардахпына хомуллан киирэн уулууллар.  Атыыр атын сылгыны чугаһаппат, көрөр-истэр буолан, бэрт. Уулаах биэлэр аа-дьуо сылдьаллар. Ким да  кыыллаан сүүрдүө диэн кыһаллыбаккын. Сороҕор хаһан аһыы түһэллэр, хааман-сиимэн абыраналлар.

Кыстык этэҥҥэ. Быйыл ичигэс буолан, сылгы туруга ама соҕус. Бөрө биллибэтэ. Сана дьыл иннигэр биир бөрө кэлбитин дьарыктанар уолбут хапкааннаан ылбыта. Уонна, хата, биллибэтилэр.

Киэһэ өттүгэр быыс буллахпына баайабын, кылы туттахха киһи сынньанар эбит, — диэтэ Иван Тутукаров.

Хаартыскалары, видеоны И.Тутукаров ыытта