Эмп-томп үлэһиттэрэ Биир кэлим информационнай ситимҥэ учуоттаныахтара

Ил Түмэн алтыс ыҥырыытын дьокутааттарын уочараттаах 42-c пленарнай мунньаҕар «Саха Өрөспүүбүлкэтин нэһилиэнньэтин доруобуйатын харыстааһын туһунан «Саха Өрөспүүбүлкэтин сокуонун 58 ыстатыйатыгар уларытыылары киллэрии туһунан» сокуон бырайыагын көрдүлэр.

Бу сокуону Саха Өрөспүүбүлкэтин Бырабыыталыстыбата көҕүлээн киллэрдэ. Бырайыакка этиллэринэн, доруобуйа харыстабылын эйгэтигэр Биир кэлим судаарыстыбаннай информационнай ситимҥэ мэдиссиинэ тэрилтэтин туһунан эрэ буолбакка, эмп-томп тэрилтэлэрин туһунан иһитиннэриилэр киириэхтэрэ.

Аны бу биир кэлим систиэмэҕэ аптека үлэһиттэрин, орто анал уонна үрдүк үөрэх тэрилтэлэригэр медик уонна фармацевт идэлэригэр үөрэнэ сылдьар устудьуоннар тустарынан дааннайдар киириэхтэрэ. Манна үөһээ ыйыллыбыт категория дьону учуоттааһыны таһынан тус бэйэлэрин туһунан дааннайдар эмиэ киириэхтэрэ.
Ити дааннайдары тустаах эмп-томп тэрилтэлэрэ, мэдиссиинэ уонна үөрэх тэрилтэлэрэ биэрэллэрэ этиллибит.
Норуот дьокутааттара сокуон бырайыагын ырытан көрөн баран бастакы ааҕыыга ылыннылар.