Эмсэҕэлээбит дьон сөптөөх көмөнү кэмигэр ылыахтаах

Бүгүн Ил Дархан Айсен Николаев икки сүрүн боппуруоһунан СӨ Бырабыыталыстыбатын уонна СӨ Баһылыгын уонна Бырабыыталыстыбатын дьаһалтатын салайааччыларын кытта мунньаҕы ыытта.

Мунньахха, бастакытынан, бүгүн «Денисовскай» ГОК-ка тахсыбыт суол саахалын, иккиһинэн, күүстээх ардахтартан халааннаабыт улуустар боппуруостарын көрүү буолла.

«Араас эт-хаан эчэйиитин ылан эмсэҕэлээбиттэр бааллар. Саха сиринээҕи катастрофа мэдиссиинэтин киинин хамаандата онно үлэлиир, эмсэҕэлээбиттэргэ барыларыгар наадалаах көмө оҥоһуллар. Бу киэһэ Нерюнгри оройуонугар көтүөм, онно миэстэтигэр тиийэн өлбүт уонна эмсэҕэлээбит дьон дьиэ кэргэттэригэр наадалаах көмөнү хааччыйыы боппуруостарын быһаарыам», — диэн Ил Дархан иһитиннэрдэ.

Ууттан эмсэҕэлээбит улуустарга үлэ салҕанар. Айсен Николаев уу таһыма намтыы турарын уонна сотору кэминэн дьон олорор сириттэн түһүөҕүн эттэ. Ол кэнниттэн тута чөлүгэр түһэрэр үлэлэр саҕаланыахтара.

«Мин сорудаҕым быһыытынан, өрөспүүбүлүкэ Бырабыыталыстыбатын Бэрэссэдээтэлэ Кирилл Бычков салайааччылаах Бырабыыталыстыбаннай бөлөх бүгүн Абый уонна Өймөкөөн оройуоннарыгар көттө. Кинилэр соруктара – саахал кэнниттэн чөлүгэр түһэрэр үлэлэри тэрийии. Сотору кэминэн эмсэҕэлээбит сэлиэнньэлэргэ мобильнай мэдиссиинэ биригээдэлэрэ барыахтара. Кинилэр састааптарыгар терапевтэртэн саҕалаан психологтарга тиийэ араас хайысхалаах исписэлиистэр киириэхтэрэ. Эмсэҕэлээбиттэртэн сайабылыанньалары ылыы уонна ону көрүү үлэтэ тэрилиннэ. Дьон көмөнү кэмигэр ылыахтаах. Бары үлэни түмсэн  тэрийэргэ сорудахтаатым. Биир да киһи өйөбүлэ суох хаалыа суохтаах уонна наадалаах көмөнү ылыахтаах. Үлэ салҕанар», — диэтэ Айсен Николаев.