Эмсэҕэлээбит дьону пограничнай сулууспа үлэһиттэрэ аҕаллылар

Лаптевтар муораларыгар баар Столбовой арыыга буолбут баһаарга эмсэҕэлээбит икки эр киһини алтынньы 3 күнүгэр Тиксии бөһ. пограничнай комендатуратын Отдела  МИ-8 бөртөлүөтүнэн аҕалла, диэн СӨ Быыһааччылар сулууспалара иһитиннэрэр.

Балаҕан ыйын 23 күнүгэр 2024 с. Столбовой арыыттан полярнай ыстаансыйа начаалынньыгыттан иһитиннэрии киирбитэ, ыстаансыйаҕа уокка сиэппит ыарахан туруктаах икки киһи баар диэн. Бу дьон балааккалара умайан эмсэҕэлээбиттэр.

Муора арыыта ыраах баарыттан, күүстээх тыал түһэ турарыттан балаһыанньа уустугурбут.  Уунан да, салгынынан да тиийэр ыараабыт.

СӨ быыһааччыларын сулууспата Гражданскай оборуона дьыалаларыгар уонна олоххо куттал суох буолуутун хааччыйар министиэристибэни кытта эмсэҕэлээбит дьону быыһыырга ылсыбыттар.

Бэҕэһээ, алтынньы 3 күнүгэр, Тиксииттэн Столбовой арыыга илиҥҥи-арктическай оройуоҥҥа Арассыыйатааҕы ФСБ Пограничнай управлениетын үлэһиттэрэ бөртөлүөтүнэн көппүттэрэ уонна эмсэҕэлээбиттэри аҕалан Булуҥ оройуонунааҕы балыыһа хирургическай отделениетыгар туттарбыттар. Быыһааччылар сулууспалара илиҥҥи-арктическай оройуоҥҥа Арассыыйатааҕы ФСБ Пограничнай управлениетын үлэһиттэригэр уонна Тиксии бөһ. Пограничнай комендатуратын кэлэктиибигэр махталларын тиэрдэллэр.