Эмтэнээччи суруга барыта болҕомтоҕо ылыллар

Ханнык баҕарар эмтэнээччи тустаах ыйытыытыгар сөптөөх харданы, көмөнү ылар кыахтаах. Ол эбэтэр кини көннөрү суругун сэргэ, «суһал лииньийэни», чат-боттары уо.д.а. туһаныан сөп.

Саха Өрөспүүбүлүкэтигэр РФ Росздравнадзорын салайааччыта Евгений Иннокентьев иһитиннэрбитинэн, былырыын кинилэр биэдэмистибэлэригэр 578 киһи кыһалҕатын биллэрбит. Онтон 47-тэ —  бигэргэтиллибэтэх, 164 үҥсүүгэ —  быһаарыы оҥоһуллубут, 210 – атын уорганнарга ыыппыттар, 85 – сөптөөх дьаһал ылыллыбыт.
Салайааччы бэлиэтииринэн, ураты болҕомтону мэдиссиинэ чааһынай килииникэлэрин, косметология исписэлиистэрин уо.д.а. үлэлэригэр ууруу ирдэнэр.
Уопсайынан, балыыһалары  мэдиссиинэ тэриллэринэн сэбилээһин туһунан этиилэр киириилэрэ аҕыйаабыт. Доруобуйа харыстабылын бастакы сүһүөх звеноларын модернизациялааһын бырагырааматынан уонна хамсык кэмигэр ыытыллыбыт күүстээх үлэ түмүгүнэн, билигин үгүс Оройуоннааҕы балыыһалар КТ-аппарааттаахтар, ПЦР уонна ИФА-диагностикатын ыытар лаборатория тэриллэрдээхтэр. Онон, бу өҥөлөр бэйэлэригэр оҥоһуллар буоланнар, мэдиссиинэ көмөтө улуус олохтоохторугар табыгастаах буолла.
Ону сэргэ, иһитиннэрэр саҥа технологиялар Саха сирин олохтоохторун этиилэрин, үҥсүүлэрин үөрэтэргэ көмөлөөхтөр. Чат-боттарга киирбит суруктарынан быраастарга суруйтарыыны  уо.д.а. боппуруостары тута быһаарыахха сөп.
СӨ Доруобуйа харыстабылын министиэристибэтин мэдиссиинэ көмөтүн хаачыстыбатыгар уонна гражданнар суруктарыгар биэдэмистибэ хонтуруолун отделын салайааччыта Сардана Тарабукина эппитинэн, аҥаардас «Судаарыстыбаннай өҥөлөр» портал ханаалынан сыл аайы 16 тыһыынчаттан тахса этии үөрэтиллэр, быһаарыллар.
Ону таһынан Доруобуйа харыстабылын министиэристибэтэ тэрилтэлэргэ былааннаммыт уонна былааны таһынан бэрэбиэркэлэри ыытар.
Саха сирин олохтоохторо Мэдиссиинэ Булгуччулаах страховкатын территориятааҕы пуондатын суукканы быһа үлэлиир «суһал лииньийэтин» көхтөөхтүк туһаналлар. Биир да этии болҕомтоҕо  ылыллыбакка хаалбат.