«Эн соҕотох буолбатаххын» диэн дьахталлары көмүскүүр бырайыагы толкуйдаатылар

Саха сирин олохтоохторо «Эн соҕотох буолбатаххын» диэн кэргэттэриттэн, эр дьонтон атаҕастанар дьахталларга туһуламмыт бырайыагы толкуйдаатылар.

Бырайыагы алтынньы 22 күнүгэр сидьиҥ дьон илиилэриттэн олохтон туораабыт Надежда Аммосова кэриэһигэр анаатылар. Бырайыак уустук балаһыанньаҕа түбэспит кэрэ аҥаардарга уйулҕа, юридическай өттүнэн бастакы көмөнү оҥорор сыаллаах.

Надежда Аммосованы бииргэ олоро сылдьыбыт, чугастык саныыр киһитэ хас да дьону кытта куомуннаһан сидьиҥник  өлөрбүттэрэ. Усуйаана оройуонун Сайылык нэһилиэгиттэн төрүттээх Надежда кыра сааһыгар тулаайах хаалбыт. Тоҕус бииргэ төрөөбүттэртэн саамай кыралара буолан, кинини эдьиийэ ииппит. Бу иэдээннээх айдаан кэнниттэн атаҕастабылга олорор дьахталлар бэйэлэрин олохторун устуоруйатын социальнай ситимҥэ киэҥник тарҕаппыттара.

«Саха сирэ» хаһыат кэлэр нүөмэригэр бу тиэмэҕэ туһуламмыт ыстатыйаны сиһилии ааҕаргытыгар ыҥырабыт.