Өнөрдөр 1941 сыллаахха тутуллубут оскуолаҕа үөрэнэ олороллор

Ааспыт нэдиэлэҕэ Уус Алдан улууһугар ситэриилээх былаас отчуота буолан ааспыта.

Өнөр нэһилиэгэр хас биирдии тыл эппит киһи Аҕа дойду Улуу сэриитин кыттыылааҕа, РФ Дьоруойа М.М. Стрекаловскай аатын сүгэр оскуола-саад хаһан тутулларын туруорсубута. Оннооҕор алын кылаас үөрэнээччилэрэ тахсан, ситэриилээх былаас бэрэстэбиитэллэриттэн оскуолабыт тутуутугар көмөлөһүҥ диэн көрдөспүттэрэ. Учуутал Наталья Ушницкая үлэлээбитим 30 сылын устатыгар оскуола суоҕуттан, элбэх киһи, учуутал көһөн барда диэн тоһоҕолоон бэлиэтээбитэ.

Отчуот кэнниттэн нэһилиэк баһылыга Николай Лукачевскай хайдах усулуобуйаҕа оскуола үлэлии турарын көрдөрбүтэ. Ордук 1941 сыллааҕы тутуу үлэлии турара сөхтөрбүтэ. Бу дьиэни оччотооҕу эдэр уолаттар тутан баран, Аҕа дойду Улуу сэриитигэр барбыттар. Ол дьиэлэригэр баччааҥҥа диэри алын кылаас үөрэнээччилэрэ үөрэнэ олороллор, орто сүһүөхтэр спортивнай саалаҕа, сорохтор мастарыскыайга. Аһыыр сирдэрэ, биллэн турар, туспа турар. Онон күҥҥэ иккитэ-үстэ онно кэлэн аһыыллар. Былырыын биир выпуск спортивнай саалаҕа 11 сылы быһа үөрэнэн бүтэрбит.

“Отучча сылы быһа саҥа оскуоланы туруорсабыт. Дьоруой аатын сүгэр оскуоланы ытыктаабат буоллахпытына, оҕолору хайдах патриот буоларга иитэбитий?”, — дииллэрэ оруннаах буолан тахсар.

Үөрэнэр усулуобуйа суоҕуттан оҕолоох дьон оскуолалаах сиргэ көһөллөр эбэтэр үчүгэй үөрэхтээх оҕолор РЛИ, МАШ, о.д.а. оскуолаларга бараллар. Ол гынан баран муус хамсыырыгар биир улахан ситиһии баар буолбут – оскуола-саад тутуутун бырайыага уонна экспертизата оҥоһуллубут.

Аны оскуоланы кытта тэҥҥэ саҥа хочуолунай үлэҕэ киириэхтээх, оччоҕо нэһилиэк аҥара киин ититиигэ көһүөхтээх эбит. Онон оскуола тутуута чахчы тыын боппуруос буолбут. Төһө да альтернативнай тутуунан барыаххытын сөп диэн сүбэлээбиттэрин үрдүнэн, олохтоохтор инвестиционнай бырагыраамаҕа киирэн туттарар дьүккүөрдээхтэр.