Энергетик Иннокентий Слепцов дьиэ кэргэнэ быыбарга сахалыы таҥнан кэллэ

Национальнай көстүүмүнэн куоластааһын идиэйэтэ дьокутааттар оройуоннааҕы сэбиэттэрин бэрэссэдээтэлигэр Владимир Колосовка киирбитэ. Кини Амма улууһун олохтоохторугар эппитин, биир дойдулаахтара тута өйөөбүттэрэ.

«Оттон мин кэргэним Елена Слепцова ис дууһатыттан ылынан, улахан дьиэ кэргэнинэн бары сахалыы таҥаһынан барарга эппитэ. Быыбар учаастагар үөрэ көрсүбүттэрэ, элбэх киһи кэлэн биһигини кытары хаартыскаҕа түспүтэ. Ордук соторутааҕыта 2 сааһын туолбут кырабытын уонна 2-с кылааска үөрэнэр кыргыттарбыт болҕомтону уонна тардыбыттара. Уолаттарбыт 7-с уонна 9-с кылаастарга үөрэнэллэр. Быйыл биһиги дьиэ кэргэҥҥэ бэлиэ сыл – кэргэммин Еленаны кытары олорбуппут 15 сыла буолла. Биһиги бу бэлиэ даата Арассыыйаҕа дьиэ кэргэн сылыгар түбэспитэ ураты суолталаах», — диэн кэпсиир улахан дьиэ кэргэн аҕа баһылыга.

Бу биһиги оҕолорбутугар быыбардыыр учаастакка сырыыларын бастакы уопута, мин кинилэргэ быыбарга куоластааһын хайдах барарын барытын быһааран биэрдим диэн Иннокентий Слепцов кэпсиир. Кини бэйэтин холобурунан быыбарга куоластааһын диэн хас биирдии киһи гражданскай ытык иэһэ буоларын көрдөрдө. Дьиэ кэргэн быыбарга көхтөөхтүк кыттар, мэлдьи куоластыыр, тоҕо диэтэххэ, кинилэр төрөөбүт дойдулара чэчирии сайдарыгар баҕараллар.