Энергетиктэр үрдүк бэлэмнээх буолуу эрэсиимҥэ көстүлэр

Мииринэйгэ, Ленскэйгэ уонна Өлүөхүмэ оройуоннарыгар сөкүүндэҕэ 27 м. тиийэ күүстээх тыал түһэн, уот ситимин алдьаппыт. Онон өрөспүүбүлүкэ арҕаа өттүн кэккэ нэһилиэнньэлээх пууннарыгар күн-дьыл туруга мөлтөөбүтүнэн уоту араары ыытыллар.

Бу туһунан “Якутскэнерго” ПАУо Арҕааҥҥы электрическэй ситимнэрин пресс-сулууспата иһитиннэрэр. Суолга халтараан балаһыанньаны өссө уустугурдар. Онон сибээстээн, энергетиктэр биригээдэлэрэ нэһилиэнньэлээх пууннарга тиийэллэрэ уустугуран биэрэр.

Билиҥҥи кэмҥэ арҕааҥы электрическэй ситимнэр энергетиктэрэ Мииринэй куоракка, Арыылаах сэлиэнньэҕэ, Таас Үрэххэ уонна Сүлдьүкээргэ, ону тэҥэ Чернышевскай уонна Алмазнай бөһүөлэктэргэ уот ситимнэрин саахалларын туораталлар.

Таас Үрэххэ уонна Сүлдьүкээр сэлиэнньэлэригэр хочуолунайдары үлэнэн хааччыйарга резервнэй дизельнай электроыстаансыйалар үлэлииллэр. Итини таһынан энергетиктэр Сунтаар оройуонугар уот ситимин оҥороллор.