Энэргиэтиктэр иистэнэр сыахха көмөлөстүлэр

“ДЭК” хампаанньа филиала “Якутскэнергосбыт” үлэһиттэрэ 50 тыһыынча солкуобайы хомуйан, байыаннай дьайыы кыттыылаахтарыгар анаан таҥастары тигэр иистэнэр сыахха тиксэрдилэр.

— Билигин биһиги үлэбитигэр саамай сүрүнэ – иистэнэр массыыналары атыылаһыы. Олус элбэх таҥаһы тигэбит, ону бэйэбит дьиэбититтэн аҕалбыт массыыналарбыт тулуйбаттар. Онон улахан массыыналары ылыахтаахпыт. Бүгүн, холобур, 150 киһи кэлэн, сайыҥҥы таҥас кэмпилиэгин көрдөөтө. Ноҕуруускабыт улахан. Биирдиилээн дьон, тэрилтэлэр көмөлөһөллөрө олус үчүгэй, —  диэн бырайыак салайааччыта Ирина Саввина этэр.

Сыахха үлэлиир волонтердар идэтийбит иистэнньэҥнэр буолбатахтар. Баҕа өттүлэринэн, ис сүрэхтэриттэн кэлэн, көмөлөһө сылдьаллар, үгүстэрэ биэнсийэлээхтэр, ийэлэр, эбэлэр. Аан бастаан иистэнэр массыыналарын дьиэлэриттэн аҕалан, бэйэлэрин харчыларынан таҥас атыылаһан, үлэлээн саҕалаабыттара. Онтон тэрилтэлэр уонна биирдиилээн дьон көмөлөһөн барбыттара. Сыахха 15-16 араас ааттаах таҥастан турар кэмпилиэктэри тигэн, байыаннай дьайыыга барар уолаттарга биэрэн ыыталлар.

— Билиҥҥи уустук кэмҥэ бэйэ-бэйэҕэ көмөлөсүһүөххэ наада. Кэллиэгэлэрбит тута өйдөөн, нэдиэлэ иһигэр харчы хомулунна. Патриотизм, гражданскай иэс эр диэн буолбатах, дьон бу курдук ис сүрэхтэриттэн кыһаллан үлэлии сылдьалларын өйүөххүн, көмөлөһүөххүн баҕараҕын. Элбэх буолан, күүспүтүн түмтэхпитинэ, кыайыахпыт, —  диэн филиал дириэктэрэ Ньургуйаана Куприянова бэлиэтээтэ.