«Эҥсиэли хапсаҕайыгар» 115 бөҕөс кытынна

Быйылгы турнир  уһулуччулаах государственнай уонна политическай деятель Илья Егорович Винокуров төрөөбүтэ 130 сылыгар, ону сэргэ күрэх төрүттээччитэ, сүрүн спонсора, «Колми» тэрилтэни 33 салайан үлэлэтэр Николай Иннокентьевич Румянцев төрөөбүтэ 65 сылыгар анаммытынан ураты үрдүк тэрээһиннээхтик баран дьону-сэргэни олус астыннарда.

— «Эҥсиэли хапсаҕайа» күрэҕи дьон-сэргэ олус кэтэһэн  сөбүлээн көрөллөр. Хапсаҕай албастара элбэҕинэн,  көрөргө умсугутуулааҕынан чахчы саха омук биир киэн туттар төрүт-уус оонньууларыттан биирдэстэрэ буоларын икки күн устата саала толору көрөөччү кэлбитэ толору туоһулаата.   Турнир СӨ хапсаҕайга федерациятын президенэ Николай Румянцев бирииһигэр маастар нуорматын толорор квалификациялаах ыытыллан олус тыҥааһыннаахтык, сытыы киирсиилэрдээх барда. Онуоха хас биирдии бөҕөс улууһун аатын үрдүктүк тутан халбас харата бырахсыылардаах, соһуччу кыайыылардаах астык тустууну көрдөрдө. Уопсайа Саха сирин араас улуустарыттан 115 бөҕөс икки күн устата бастыҥ ааты быһаарыста. Эр дьон — 6, бэтэрээн эр дьон — 5 ыйааһыҥҥа илин-кэлин түһүстүлэр. Маны сэргэ муҥутуур кыайыылааҕы быһаарыыга 3 киирсии олохтонно. Ол курдук, эр дьоннор 85 кг диэри уонна онтон үөһэ ыйааһыҥҥа уонна бэтэрээннэр  сүрүн бириис иһин күөн көрүстүлэр.   Чемпионнар — 10 тыһ. солк. харчынан уонна статуэтканан, үрүҥ көмүс призердар — 8 тыһ., боруонса призердар — 5 тыһ. солк., мэтээлинэн, грамотанан наҕараадаланнылар.

Турнир олус өрө күүрүүлээхтик, үрдүк тэрээһиннээхтик, түргэн тэтимнээхтик барда, — диэн “Нам улууһа” МО пресс-сулууспата иһитиннэрдэ.