Эҥсиэли хочотугар Оһуокайга ыччат көхтөөх

Өрөспүүбүлүкэтээҕи Оһуокай түмсүүтүн бэрэссэдээтэлэ А.Д.Данилов-Дьулуур Хаан өйөбүлүнэн, түөрт киһилээх бөлөх Нам улууһугар тахсан киирдибит. Манна хаһыс да сылын Оһуокайга кураторынан Дархаттар сүбэлэрин бэрэссэдээтэлэ, Дархан этээччи В.В.Хорунов ананан, ситиһиилээх ситими тутан үлэлии сылдьар.

Нам улууһугар кэнники уон сылга Валентин Васильевич Оһуокайга хамсааһыны таһаарбытын билинэллэр уонна мэлдьи тэрээһин буолла да ыҥыра тураллар. Улуустааҕы Оһуокай түмсүүтэ улуустааҕы Олоҥхо дьиэтин кытары биир ситиминэн, Олоҥхо дьиэтин директора Вера Васильевна Колпашникова кытары ыкса сибээстэһэн үлэлиир. Аҕа саастаах үтүөлээх этээччи Татьяна Ивановна Евсеева өр сылларга Оһуокай салайааччытынан бэрт ситиһиилээхтик үлэлээбитэ уонна көлүөнэ утумун этэр ыччакка туттарбыта. Билигин түмсүү салайааччыта оҕолору фольклорга үөрэтэ сылдьар Вера Цыпандина.

Таҕыстахпыт аайы Олоҥхо дьиэтэ киэркэйэн, элбэх бырайыактарга хотуулаахтык үлэлээн, элбэх аныгы тэриллэри ылбыттар. Быйыл эмиэ үтүө үгэстэрин сиэрин тутуһан, Оһуокайга бэйэлэрин хардыыларын ууран эрэр В.Сыромятниковы, Р.Павловы, Т.Пестрякованы, Т.Ушканованы о.д.а. билсиһиннэрдилэр. Инникитин  өрөспүбүлүкэтээҕи  Оһуокай күрэхтэригэр көхтөөхтүк кыттар буолуохтара диэн, Оһуокай түмсүүтүн биир көхтөөх пропагандиһа М.М.Бэстинова санаатын үллэһиннэ.
Быйылгы үбүлүөйдээх саастарын көрсүбүт Дархан этээччилэргэ Валентин Хоруновка, Сэмэн Алексеевка директор Вера Васильевна махтал суругу, күрэхтэргэ илдьэ сылдьалларыгар улахан истээх тиэрмэһи бэлэхтээтэ.
Биһиги түмсүү аатыттан инники былааммытын, миэстэтигэр сылдьан балаһыанньаны билистибит. Ыйга биирдэ Намнааҕы технологическай, пелагогическай колледжка устудьуоннарга Оһуокай ыытылларын кэпсээтилэр.
Түмүккэ, өрөспүбүлүкэтээҕи   Оһуокай түмсүүтэ мэлдьи сибээстэһэн үлэлииллэрин биһирииллэрин эттилэр.

Марта Николаева