«Эпос аан дойдутааҕы энциклопедистика контекстыгар» научнай кэмпириэнсийэ ыытыллар

Дьокуускайга «Эпос аан дойдутааҕы энциклопедистика контекстыгар» диэн норуоттар икки ардыларынааҕы научнай кэмпириэнсийэ үлэтин саҕалаата. 6 дойду уонна Арассыыйа хас да эрэгийиэнин учуонайдара эпоска анаан национальнай энциклопедиялары оҥорууну дьүүллэһиэхтэрэ.

Кинилэр бүтэһик ситиһиилэрин билиһиннэриэхтэрэ уонна уопут атастаһыахтара. Тэрээһин Олоҥхо научнай-чинчийэр институтун төрүттээччитигэр уонна бастакы дириэктэригэр Василий Иванов төрөөбүтэ 90 сылыгар, Олоҥхо киһи аймах материальнайа суох култуурунай нэһилиэстибэтин сүдү айымньытынан билиниллибитэ 20 сылыгар уонна М.К. Аммосов аатынан ХИФУ Олоҥхо НЧИ-та тэриллибитэ 15 сылыгар ананар.

Кэмпириэнсийэҕэ Саха сирин норуоттарын эпическэй уонна фольклорнай нэһилиэстибэлэрин үөрэтэр 100-тэн тахса учуонай, Абхазияттан, Монголияттан, Арменияттан, Азербайджантан, Кыргызстантан, Грузияттан уонна Арассыыйа хас да эрэгийиэниттэн 21 эспиэр кыттыыны ылар. Дакылааттары Москва, Санкт-Петербург, Новосибирскай, Красноярскай, ону таһынан Алтай, Бурятия, Башкортостан, Калмыкия, Хакасия, Кабардино-Балкарскай Өрөспүүбүлүкэтэ, Хотугу Осетия, Карачаево-Черкескай Өрөспүүбүлүкэтэ, Коми, Чечен Өрөспүүбүлүкэтэ уонна Татарстан исписэлиистэрэ ааҕаллар.

«Эспиэрдэр уопут атастаһаллар, эпическэй нэһилиэстибэни үөрэтии, тарҕатыы уонна технологиялар эйгэтигэр ситиһиилэрин үллэстэллэр. Дьүүллэһиилэр сылтан сыл кэҥээн уонна дириҥээн иһэллэр. Бу сырыыга биһиги эпоска анаан национальнай энциклопедиялары оҥоруу боппуруоһун туруорабыт. Түмүгэр өрөсөлүүссүйэ ылыллыаҕа, онно бу тиэмэни сайыннарарга аналлаах бары түгэннэр суруллуохтара», – диэн Олоҥхо научнай-чинчийэр институтун дириэктэрэ Руслан Анисимов бэлиэтээтэ.

Тэрээһин «Эпическэй нэһилиэстибэни уонна толорооччу ускуустубатын үөрэтии актуальнай проблемалара» уонна «Национальнай эпостар тылларын-өстөрүн уонна поэтикаларын дисциплиналар икки ардыларынааҕы чинчийиилэр» диэн сиэксийэлэринэн ыытыллар.