Эпос уонна ускуустуба Арктическай киинэ 2024 сыл бүтүүтэ үлэҕэ киириэҕэ

Дьокуускайга тутулла турар Эпос уонна ускуустуба Арктическай киинэ 2024 сыл бүтүүтэ үлэҕэ киириэхтээх. Билигин үлэһиттэр тутуу монолит каркааһын оҥоро сылдьаллар. Ол туһунан СИА-ҕа бырайыак чааһынай партнерун «17 концессионнай хампаанньа» генеральнай дириэктэрэ Виктор Алексеенко иһитиннэрдэ.

Виктор Алексеенко эппитинэн, саҥа киин 2023 сылга үлэҕэ киириэхтээх эбит. Ол эрээри, пандемиянан сибээстэн тутуу болдьоҕо уларыйбыт. Билигин эбийиэги 2024 сыл ахсынньытыгар туттарарга былаанныыллар.

«Бүгүҥҥү күҥҥэ тутуу монолит каркааһа 60% бэлэм. Быйыл киин ис үлэтин саҕалыахтаахпыт.Эбийиэккэ барыта 220 киһи үлэлиир. Бэс ыйын ортотуттан үлэһит ахсаанын 360 киһиэхэ диэри элбэтэн, атырдьах ыйыгар монолит каркаас үлэтин түмүктүүр былааннаахпыт», — диэн кини бэлиэтээтэ.

Санатан суруйдахха, култуура баараҕай киинин иэнэ — 33 тыһ. кв м, үрдүгэ — 36, 7 м. Манна филармония, икки тыйаатыр, быыстапкалыыр уонна дьыалабыай тэрээһиннэри ыытар саалалар баар буолуохтара.