Эр киһи 94 саастаах ийэтин көрөртөн сылайан кырбаабыт

Бэҕэһээ, от ыйын 4 күнүгэр, төрөппүт уолуттан атаҕастаммыт кырдьаҕас ийэни Гериатрическай балыыһаҕа киллэрдилэр.

Санатар буоллахха, эр киһи ыарыһах кырдьаҕас дьахтары  охсуолаан, тэбиэлээн кирилиэстэн түһэрэн иһэрин туһунан социальнай ситимҥэ киэҥник тарҕаммыта. Бу тарҕанаатын кытта ийэтин атаҕастыыр киһиэхэ полиция үлэһиттэрэ дьиэтигэр кэлбиттэрэ.

Гериатрическай кииҥҥэ киирбит кырдьаҕас ийэ этэ барыта күөх баламах буолбутун балыыһа үлэһиттэрэ соһуйа көрбүттэр. 94 саастаах ийэ эмтэниини ааһан баран, салгыы ханна барарын туһунан боппуруос быһаарыллыахтаах. Оттон ийэтин тэбиэлээбит ХИФУ 60 саастаах доцена «Красная Якутия» диспансерга эмтэнэ киирбит. Быһылаан тахсар күнүгэр кини арыгы испитэ ыраатан сылдьыбыт. Социальнай ситимҥэ киэҥ айдаан тахсыбытын кэннэ эмээхсин иккис уола кэргэнинээн кэлбиттэр.

Бэлиэтээн суруйдахха, 94 саастаах ийэ 13-c сылын деменциянан ыалдьар эбит. Эр киһи ийэтин көрөртөн сылайан, өр кэм устата арыгылаабыт уонна ийэтин кырбаабыт.

СӨ Киһи быраабыгар боломуочунайын көмөлөһөөччүтэ Виктория Арылахова иһитиннэрбитинэн, кырдьаҕас ийэни салгыы чааһынай иитэр дьиэҕэ олохтуур туһунан боппуруос көрүллэр.