Эр киһи бэстилиэккэ майгынныыр тэрилинэн дьахтары куттаабытынан бэрэбиэркэ ыытыллар

Бэҕэһээ социальнай ситимнэринэн Дьокуускай куорат ЯКСМК оройуонугар «пробкаҕа» тохтоон турар массыынаттан эр киһи тахсан, илиитигэр бэстилиэккэ майгынныыры тута сылдьан, дьахтар массыынатын аанын тардыаласпыт видеота тарҕаммыта.

Бу түбэлтэнэн полиция бэрэбиэркэни саҕалаата. Бу туһунан Арассыыйа ИДьМ «Дьокуускайдааҕы» МУ пресс-сулууспата иһитиннэрэр.

Ахсынньы 26 күнүгэр киэһэ 19:34 чааска Арассыыйа ИДьМ «Дьокуускайдааҕы» МУ 3 №-дээх полиция отделын дьуһуурунай чааһыгар Дзержинскэй уулуссатыгар биллибэт эр киһи дьахтарга бэстилиэккэ майгынныыр тэрилинэн куттаабытын туһунан иһитиннэрии киирбит.

Билигин полиция үлэһиттэрэ бу түбэлтэни бэрэбиэркэлииллэр, эр киһи ким буоларын уонна туох буолбутун быһаараллар.