Эр киһи бииргэ олорор дьахтарын төбөтүн олоппоһунан хайа охсубут

Нам улууһун полициятын дьуһуурунай чааһыгар балыыһаттан биир дьахтар балыыһа үлэһиттэригэр төбөтүгэр эчэйиилээх кэлбитин уонна “бэйэм охтубутум” диэн эппитин иһитиннэрбиттэр.

Ол эрээри полиция учаастактааҕы боломуочунайа бэрэбиэркэ кэмигэр дьиҥнээх балаһыанньаны быһаарбыт – 45 саастаах бииргэ олорор киһитэ дьахтары эчэппитэ биллибит диэн ИДьМ пресс-сулууспата иһитиннэрэр.

Быһаарыллыбытынан, эр киһи дьахтарын күнүүлээбит, онтон сылтаан кинилэр икки ардыларыгар этиһии тахсыбыт. Этиһии кэмигэр кини мас олоппоһунан дьахтарын төбөҕө охсубут. Эмсэҕэлээбит дьахтар төбөтүн бааһын балыыһаҕа тикпиттэр.

РФ Холуобунай кодексатын 115-с ыстатыйатын 2-с чааһынан (Атын киһи доруобуйатыгар соруйан эчэйиини оҥоруу) холуобунай дьыала тэрилиннэ.