Эр киһи электросамокаты уоран, сиэннэригэр бэлэхтииргэ санаммыт

Арассыыйа ИДьМ «Дьокуускайдааҕы» 3 №-дээх полиция отделын дьуһуурунай чааһыгар электросамокаттарынан дьарыктанар тэрилтэ үлэһитэ электросамокат уоруллубутун туһунан сайабылыанньа киллэрбит. Инньэ гынан 29 тыһыынча солкуобай кэриҥэ хоромньу тахсыбыт.

Суһал, ирдиир тэрээһиннэр түмүктэринэн, холуобунай ирдэбил үлэһиттэрэ 47 саастаах Уус Алдан улууһун олохтооҕун туппуттар.

Онно биллибитинэн, уорбаланааччы эр киһи Дьокуускай куорат Можайскай уулуссатыгар баар дьиэ аттыгар электросамокат турарын көрөн уорбут. Уорбаланааччы электросамокаты сиэннэригэр бэлэх оҥороору уорбутун диэн билиммит.

Арассыыйа Холуобунай кодексын 158 ыстатыйатын 1 чааһынан («Уоруу») холуобунай дьыала тэрилиннэ. Бу ыстатыйанан буруйдаах 2 сылга диэри көҥүлэ быһыллыан сөп.