Эр киһи Өлүөнэ өрүһү туорааһыҥҥа сураҕа суох сүппүт

Үс быыһааччы вездеходунан Өлүөнэ өрүһү туорааһыҥҥа үс күн анараа өттүгэр сүппүт эр киһини көрдүүллэр. Бу туһунан кулун тутар 10 күнүгэр Саха сиринээҕи Быыһыыр сулууспатыгар иһитиннэрдилэр.

Күнүс бээтинсэҕэ 44 саастаах эр киһи дьиэтиттэн Хатастан тахсан, Мэҥэ Хаҥалас улууһун Павловскай сэлиэнньэтигэр хайысханан сатыы айаннаабыт. Киэһэ 22:00 чаас саҕана эр киһи ийэтигэр төлөпүөннээн муммутун туһунан эппит. Ити кэнниттэн аймахтара түүн эрийэ сатаабыттар да, сүппүт киһи төлөпүөнэ сибээскэ тахсыбатах.

Бу суолунан эр киһи элбэхтик сылдьыбата бэлиэтэнэр. Сэтинньигэ эмиэ муммут да, ол гынан баран дьоҥҥо тахсан биэрбит.