Эр киһи хараҕыттан үөнү хостообуттар

Мииринэй оройуонугар эр киһи хараҕа ыалдьан, балыыһаҕа кэлбит. Быраастар хараҕыттан үөнү булбуттар. Бу туһунан ЯСИА суруйар.

Эр киһиэхэ Дьокуускайтан Мииринэйгэ командировкаҕа кэлбит офтальмолог-быраас Пантелеймон Аргунов көмөлөспүт.

«Ыарыһах хараҕар туох киирбитин билбэт этэ. Таһырдьа тыала суохха дылы этэ диэбитэ. Хараҕын көрө сылдьан хара бээтинэ баарын булбутум. Микроскобунан быһаарбыппыт, оҥоойу эбит. Хараҕар хаапыла кутан баран, туох да уустуга суох хостообуппут. Эр киһи тугум да ыалдьыбат диэн, тута дьиэлээбитэ», — диэн Өрөспүүбүлүкэтээҕи Харах балыыһатын офтальмолог-бырааһа Пантелеймон Аргунов ЯСИА-ҕа иһитиннэрбит.