Эр киһи инфарктаары гыммытын хайдах быһаарабыт?

Сүрэх ыарыытын саамай ыарахан көрүҥэ инфаркт буолар. Хомойуох иһин, инфаркт эр дьоҥҥо эдэрсийэн иһэр. Тоҕо диэтэххэ, эр киһи истириэһи, буолар быһыыны-майгыны чуумпутук, барытын бэйэтин иһигэр тутар, сөҥөрөр. Дьахтар курдук санаатын таска таһаарбат.

Эр киһи инфарктаары гыммытын хайдах быһаарабыт?  Кардиолог-быраас Наталья Гаврилюк быһаарарынан, сүрэх инфаркта эр дьоҥҥо олох биллибэккэ сылдьыан сөп. Ардыгар инфаркт буолбутун кэннэ электрокардиография көмөтүнэн быһаарбыт да түгэннэрэ бэлиэтэммит. Инфаркты ардыгар кылгас кэмҥэ сүрэх тохтоон ылбытыгар булкуйаллар. Ол эрээри миокарда  инфаркта сүрэххэ хаан эргиирин кэһиллиитэ буолар.

Өскөтүн, маннык түгэннэр бэлиэтэннэхтэринэ, суһал көмөнү ыҥырыҥ!

— Түөс ыалдьан ылыыта. Эр дьон манныкка улахан болҕомто уурбакка сыыстараллар. Ордук эр киһи хаҥас түөһэ ыалдьан баран илиитигэр тиийэ ыалдьыан сөп. Онтон санна, күөмэйэ уонна сыҥааҕа ыалдьар буоллаҕына, бу бастакы бэлиэлэр буолалларын умнумаҥ.

-Сүрэх хам ылыыта. Салгын тиийбэт эбэтэр түөс өрө анньан кэбиспит курдук буолуута сэрэхтээх. Эмиэ хаҥас түөс хам ылыытыттан тахсар. Маннык балаһыанньа 15-20 мүнүүтэ устата уһуон сөп. Долгун курдук ааһа-ааһа хатыланыан сөп. Тута суһал көмөнү ыҥырар наада.

-Ардыгар инфаркт көрүҥэ эр дьоҥҥо бииллэрин үрдүнэн тэһитэ кэйиэлээн ыалдьан саҕаланыан сөп. Куртах  үөһээтинэн хам ылыан сөп. Үгүс дьон куртах ыарыытыгар булкуйар.

— Көҕүс кэйиэлиэн, моой ыга тутуон сөп.

-Тыын хаайтарыыта буолуон сөп. Кыраны да хааман баран күүскэ аҕылыыр буоллахха, бу сэрэхтээх бэлиэ. Сорох эр дьоҥҥо мэйиилэрэ эргийиэн сөп. Тымныы көлөһүн тахсыыта, хотуолуох санаа кэлиитэ суһал мэдиссиинэ көмөтүн эрэйэр.

Эр дьоҥҥо инфаркт хаан хойдуутуттан тахсыан сөп. Аһары элбэх чэйи, кофены иһэр эр дьон инфарктка бэринимтиэлэр. Ардыгар хаан хойдуута сүрэх иһигэр эмиэ буоларын быраас бэлиэтиир. Инфаркт буоларын  ЭКГ — электрокардиография эрэ быһаарар. Маны таһынан эхокардиография уонна сүрэх УЗИ-та быһаарар.

Соһуччу ыарыйдахха, холкутуу сатыыр уонна хамсаабакка сытан эрэ суһал мэдиссиинэ көмөтө кэлиэр диэри хааны убатан аспирин иһиэххэ сөп.