Эр киһи ойоҕун тимир олоппоһунан сынньыбытынан 800 тыһ. солк. төлүүр буолла

Ойоҕун остуолунан охсубут эр киһи  ойоҕор 800 тыһ. солк. моральнай буруйу толуйуу быһыытынан төлүүр буолла. Бу быһылаан 2020 сыл от ыйыгар тахсыбыт. Бу туһунан СӨ Үрдүкү суутун пресс-сулууспата иһитиннэрэр.

Бииргэ арыгылыыр кэмнэригэр, күнүүлээн эр киһи дьыбааҥҥа сытар ойоҕун тимир олоппоһунан хаста даҕаны төбөтүгэр охсубут. Түмүгэр дьахтар ыараханнык бааһырбыт. 2021 сылга суут эр киһини буруйдааҕынан билиммит уонна түөрт сылга болдьоххо усулуобунайдык көҥүлүн быһарга уураахтаабыт. Ол кэннэ кэргэнниилэр арахсыбыттар.

Кэлин дьахтар арахсыбыт кэргэниттэн 10 мөлүйүөн солкуобайы моральнай буруйу толуйуу быһыытынан суукка үҥсүү түһэрбит. Буруйдааначчы өттүттэн бэрэстэбиитэл сууманы аһары үрдэтиллибитинэн сууттан аккаастыырга көрдөспүт. Суут толуйуу суумматын 800 тыһыынча солкуобайга диэри түһэрбит.  Үрдүкү суут быһаарыыны уларыппакка оннунан хаалларда.