Эр киһини кырбаабыт 15 уонна 16 саастаах уолаттары буллулар

Дьокуускайга полиция үлэһиттэрэ эр киһини кырбаабыт дьон кимнээх буолалларын быһаардылар. Бу туһунан ИДьМ пресс-сулууспата иһитиннэрэр.

Полицейскайдар интэриниэккэ тарҕаммыт видео-устууга эр киһини кырбыыр уолаттары буллулар. Бу — Дьокуускайга олорор 15 уонна 16 саастаах уолаттар.

Билигин полиция быһылаан тула бэрэбиэркэни ыытар, ол түмүгүнэн сокуонунан көрүллэр миэрэлэр ылыллыахтара.

Сааһын ситэ илик уолаттары уонна кинилэр сокуоннай бэрэстэбиитэллэрин кытта сааһын ситэ илик оҕолор дьыалаларынан дьарыктанар иниспиэктэрдэр үлэлииллэр.