Өр сылларга дириэктэрдээбит Анна Бурнашева ыалдьыттаата

Улуустааҕы Социальнай кэлим киин оҕолорго аналлаах стационарнай отделениетыгар быйыл Уус Алданнааҕы оҕолорго аналлаах социальнай-реабилитационнай киин тэриллибитэ 20 сылын көрсө бу тэрилтэни тэрийбит, өр сылларга дириэктэринэн  үлэлээбит Саха Өрөспүүбүлүкэтин  норуотун хаһаайыстыбатын үтүөлээх үлэһитэ, СӨ социальнай настаабынньыга  Анна Прокопьевна Бурнашева Дьокуускай куораттан кэлэн,  үлэһиттэри кытары көрүстэ.

Анна Прокопьевна  тэрилтэ тэриллибит устуоруйатын, бэйэтэ үлэлээбит кэмнэрин көрдөрөр баай матырыйааллаах быыстапкатын  сиһилии билиһиннэрдэ, эдэр үлэһиттэргэ үтүө сүбэтин анаата.

Ол саҕана тэрилтэ сайдыытыгар попечительскай сүбэ бэрэссэдээтэлинэн үлэлээбит Олег Федорович Федоров, эмиэ ол кэмнэргэ социальнай партнер быһыытынан үлэлэспит «Алаас Хотуна» Мүрү нэһилиэгин дьахтар сүбэтиттэн бэрэссэдээтэл Валентина Николаевна Шадрина уонна СӨ норуотун маастара Мария Семеновна Атласова оҕо туһугар тэрилтэни кытары алтыспыт кэмнэрин  сылаастык ахтан-санаан аастылар. Мария Семеновна оҕолорго сайдалларыгар анаан наһаа үчүгэй кинигэлэри бэлэхтээтэ. Тэрилтэ Саха сирин социальнай үлэһиттэрин туһунан аан бастаан тахсыбыт энциклопедия 1 туомугар  Анна Прокопьевнаны киллэртэрбитэ. Үлэһит дьон сыралаах үлэлэрин кэрэһиттэрэ буолар улахан, халыҥ кыһыл тастаах, сабыс-саҥа энциклопедия кинигэни   билиҥҥи бөдөҥөөбүт улахан тэрилтэ профкомун бэрэссэдээтэлэ Күннэй Руслановна Давыдова Анна Прокопьевналыын бииргэ үлэлээбит кэмнэрин туһунан иһирэхтик ахтан-санаан туран, дохсун ытыс тыаһын ортотугар туттарда. Тэрээһин кыттыылаахтара итии-истиҥ эҕэрдэлэрин тириэртилэр, бэлэхтэрин туттардылар. Анна Прокопьевна истиҥ сыһыантан долгуйда,  үөрдэ, махтанна. Бүгүн үлэһиттэр 20 сыллааҕыта оҕоҕо ананыахтаах дьиэ  хайдах өрөмүөннэммитин, оҕолорго сөп түбэһэр гына оҥоһуллубутун биллилэр, оччотооҕу кэмҥэ оҕону, дьиэ-кэргэни кытары үлэ, ирдэбиллэр тустарынан сэргээн иһиттилэр, устуоруйа кэрчигэ буолар быыстапканы кэрэхсээн көрдүлэр. Ол кэмтэн ыла олоххо, үлэҕэ уларыйыы хайдах курдук күүскэ киирбитин, сайдыы хайдах курдук балысханнык барбытын, урукку кэми билиҥҥини кытары тэҥнээн көрөр кыахтаннылар, бэйэлэрин үлэлэрин туһунан кэпсээтилэр, ыалдьыттар ыйытыыларыгар хоруйдаатылар.

Бүгүҥҥү күн эдэр дьоҥҥо үлэҕэ сыһыан, оҕоҕо, төрөппүккэ болҕомто үтүө холобура буолан, үлэлэригэр, олохторугар туһалыы сылдьыаҕа, инникигэ эрэли үөскэтиэҕэ. Хайа да тэрилтэ тэриллибит, сайдыбыт устуоруйалаах, үлэлээн ааспыт, кылааттарын киллэрбит дьонноох буоллаҕа. Кинилэр ааттара өрүү ааттана туруохтун, тэрилтэлэр устуоруйалара үйэтитиллэн иһиэхтин!

Светлана БУРЦЕВА, уопсастыбаннай кэрэспэдьиэн