Эрбии биитинии  эрийсэн 76 тыһ. тахса үөрэнээччи кытынна

“Спортивные якутяне” үөрэнээччилэр өрөспүүбүлүкэтээҕи спартакиадаларын саамай маассабай, Арассыыйаҕа ханыыта суох күрэхтэһии диэн бэлиэтииллэрэ оруннаах. Быйылгы спартакиада оскуола таһымынааҕы түһүмэҕэр барыта 76 тыһ. тахса оҕо кытынна.

Спартакиада хас даҕаны сыл тохтуу сылдьан баран, Ил Дархан көҕүлээһининэн үс сыллааҕыта сөргүтүллүбүтэ. Быйылгы тэрээһин түмүктүүр түһүмэҕэр Дьокуускайы, Жатайы киллэрэн туран муниципальнай тэриллии 32 хамаандатыттан 1029 үөрэнээччи кытынна. Бастакы оскуолаларынан түһүмэххэ букатын 76,8 тыһ. тахса кыттааччы хабылынна. Спартакиада үөрэх дьылын устата түһүмэхтэринэн 29 көрүҥүнэн ыытыллар. Быйыл дроннар күрэхтэһиилэрэ уонна фитнес-аэробика көрүҥнэрин эбии киллэрэн биэрдилэр. Түмүктүүр түһүмэххэ оҕолор успуорт биэс көрүҥэр (бокса, волейбол, көҥүл тустуу, чэпчэки атлетика, мас-тардыһыыта) Дьокуускайга кэлэн күрэхтэстилэр.

Спартакиада ыытыллыбыт хас успуорт саалатын ахсын бэрт тыҥааһыннаах киирсиилэр буоллулар. Итиэннэ биэс көрүҥ буолан тэрээһин чөкө соҕустук ааста, кэрийэ сылдьан көрөргө даҕаны табыгастаах.

“Спортивные якутяне” спартакиада кылаабынай судьуйата Юрий Балаганскай:

— Спартакиада түмүктүүр түһүмэҕэр биэс көрүҥүнэн барыта 102 судьуйа үлэлээтэ. Быйылгы финал чөкө буолла, холкутук ааста. Балыйсыы, бырачыас эҥин суох. Хас көрүҥ аайы судьуйалар бэркэ үлэлээтилэр.

Хамаанданан миэстэлэһиини ылан көрдөххө, былырыыҥҥытааҕар өрө тахсыы баар. Холобур, хаҥаластар, горнайдар алҕастарын көннөрүнэн, быйыл үс иһигэр киирдилэр. Эһиил, баҕар, өссө үөһэ тахсыахтара.

Көрүҥнэринэн ылан көрдөххө, түмүктүүр түһүмэххэ волейболга уолаттар да, кыргыттар даҕаны күрэхтэһиилэригэр Чурапчы уонна Дьокуускай куорат оонньоотулар. Ол түмүгэр иккиэннэригэр дьокуускайдар бастаатылар.

Нерюнгри баскетболистара уоллуун, кыыстыын былырыын маҥнайгы миэстэни ылбыттара, быйылгы кыттар оҕолоро эмиэ инники түстүлэр. Холобур, былырыын атыттар оонньообуттара.

Кылаабынай судьуйа буоларым быһыытынан, тус бэйэбэр улуустар бэрэстэбиитэллэрэ былырыын, быйыл түмүктүүр түһүмэх ыытыллар күнүн эбэтэр кыттар оҕолор саастарын уларытыахха диэн этэллэр. Сорох хамаандаҕа тохсус кылаастар кытталлар, эксээмэннээх сыллара буолан ыктараллар, Саҥа дьыл кэнниттэн эксээмэннэргэ күүскэ бэлэмнэнии саҕаланар диэн санааларын этэллэр. Аны түмүктүүр түһүмэх оруобуна эксээмэн кэмигэр ыытылларын быһыытынан, сорохтор Дьокуускайга кэлэллэрэ кыаллыбат дииллэр. Бэрэстэбиитэллэр санааларын тэрийээччилэргэ тириэртим. Бу спартакиада урукку сылларга ыытылларыгар, бэс ыйын бүтүүтэ, от ыйын саҥата буолара диэн ахталлар. Саастаах учууталлар, тириэньэрдэр итини бэркэ өйдүүллэр, урут кыаллар этэ диэн туруорсаллар, — диэн этэр.

Бастыҥ тириэньэрдэргэ — 100 тыһ. солк.

Балаһыанньа быһыытынан быйылгы күрэхтэһии успуорт 29 көрүҥэр ыытылынна. Ил Дархан Айсен Николаев быһаарыытынан, оҕо успуордун сайдыытын өйүүр инниттэн, күүстээх хамаандалары, чөмпүйүөннэри бэлэмнээбит тириэньэрдэргэ 100 тыһ. солк. суумалаах анал сэртипикээттэри туттараллар. Онон быйыл 31 учууталга, тириэньэргэ тэрээһин үөрүүлээх сабыллыытын кэмигэр Бырабыыталыстыба бэрэссэдээтэлин солбуйааччы Сергей Местников анал сэртипикээттэри туттарда.

Светлана Колосова, Мэҥэ Хаҥалас улууһун физкултуураҕа учуутала, 100 тыһ. солк. анал сэртипикээт хаһаайына:

— Мин Чурапчытааҕы физическэй култуура уонна успуорт институтун бүтэриэхпиттэн Аллараа Бэстээх 1‑кы нүөмэрдээх оскуолатыгар учууталынан үлэлиибин, уонтан тахса сыл буолла.

Многоборье ГТО көрүҥэр барыта тоҕус көрүҥ киирэр. Уопсайа түөрт оҕом миэстэлэстэ.

Физкултууранан, успуордунан дьарыктаныан баҕалаах оҕо элбэх. Айылҕаттан бэриллибит дааннайдаах оҕолору, төһө кыайарбытынан, дьарыктыыбыт. Сорох оҕолор бэйэлэрэ сөбүлээн эрчиллэллэр, өссө ханна күрэхтэһэ барабыт, хаһан дьарыктанабыт дэһэллэр.

Үчүгэйдик кыттыбыккыт иһин сэртипикээт туттарыахпыт, кэлээр диэбиттэрэ. 100 тыһ. солк. сэртипикээти көрөн баран олус соһуйдум, үөрдүм, букатын кэтэспэтэҕим.

Кэргэним волейболист, үс оҕолоохпут. Уолбут эмиэ волейболлуур, 2013 сыллаах оҕолорго өрөспүүбүлүкэҕэ бастаабыттара. Кыыспыт харбааһынынан дьарыктаммыта үһүс сыла, быйыл 2 юношескай эрэсэрээти толордо. Кырабыт уһуйааны бүтэрдэ, эмиэ успуордунан дьарыктанар баҕалаах.

Дима Данилов, Өлөөн хамаандатын кыттааччыта, көҥүл тустууга бастакы миэстэлээх:

— Спартакиадаҕа үһүс сылбын кыттабын. Былырыын үһүс миэстэлэммитим (51 кг), иллэрээ сыл бастаабытым (52 кг.), быйыл 60 киилэҕэ бастаатым. Спартакиада үчүгэйдик ааста. Маҥнайгы миэстэни ылан үөрдүм.

Бэйэм Өлөөн улууһуттан төрүттээхпин, кырабар биирдэ эмэ тустарым. 5‑с кылааска үөрэнэр сылбар Сунтаарга баран тустуунан утумнаахтык дьарыктанар буолбутум. Тустуу киһиэхэ олус туһалаах, майгыны-сигилини күүһүрдэр, тулуурдаах, кытаанах оҥорор. Билигин УОР-га үөрэнэбин, 1‑кы кууруһу бүтэрдим. Олохпун успуорду кытта ситимниир санаалаахпын.

1 бөлөххө:

Дьокуускай куорат

Мэҥэ Хаҥалас улууһа

Хаҥалас улууһа

2 бөлөххө:

Чурапчы улууһа

Үөһээ Бүлүү улууһа

Горнай улууһа.

3 бөлөххө:

Кэбээйи улууһа

Томпо улууһа

Өймөкөөн улууһа

4 бөлөххө:

Өлөөн улууһа

Анаабыр улууһа

Эдьигээн улууһа.

Бастакы миэстэлээх хамаандалар дьупулуомунан, кубогынан уонна 250 тыһ. солк. суумалаах сэртипикээтинэн наҕараадаланнылар, иккис миэстэлээхтэр — 150 тыһ. солк., үһүс миэстэлээхтэр — 100 тыһ. солк.