Эрдэлээн төрөөбүт ньирэйи быыһаатылар

Кулун тутар ыйга Ньурба улууһун Маалыкай сэлиэнньэтигэр «Сайдыы» тыа хаһаайыстыбатын кэпэрэтиибигэр ситэ сайдыбатах ньирэй эрдэлээн төрөөбүтэ. Бу туһунан Бэтэринээрийэ департамена иһитиннэрэр.

Ньирэй түүтэ, тииһэ суох этэ, эттиктэрин атастаһыытыгар кэһиллиилээх  буолан, аһыырыгар, хамсанарыгар, бэл, тахсан киирэригэр ыарахаттары көрсөр эбит.

ТХПК бэтэринээрэ, урут Маалыкайдааҕы бэтэринээринэй балыыһа исписэлииһинэн үлэлээбит Александра Иванова, ньирэйи төрүөҕүттэн көрөн-харайан, бүөбэйдээн, эмтээн, улаатарын, саастыылаахтарын ситэрин ситиспит. Билигин ньирэй уонна ийэтин туруктара үчүгэй.

Ситэ сайдыбакка, болдьоҕун иннинэ эрдэлээн төрөөбүт ньирэй тыыннаах хааларын, этэҥҥэ улаатарын ситиһэр уустук дьыала. Хайдах эмтиири, көрөрү-харайары билбэт буоллахха, үксүгэр маннык ньирэйдэр уһаабаттар.

Уопуттаах бэтэринээр сүөһүнү билэрэ бэрт буолан уонна хаһаайыстыба үлэһиттэрэ кыһаллан-мүһэллэн, күнүстэри-түүннэри көрөн-истэн, сотору-сотору аһатан, бүөбэйдээбиттэрин иһин, ньирэй улаатан, сүөһү төрдө  буолуоҕа.