«Өрө көтөҕүллүү» -– биирдиилээн толорооччулар кэнсиэртэрэ

Быйыл Сергей Зверев-Кыыл Уола төрөөбүтэ 125 сыла өрөспүүбүлүкэҕэ киэҥ далааһыннаахтык бэлиэтэниэҕэ. Кыыл Уолун аатын дьоһуннаахтык сүгэн  сылдьар Үҥкүү национальнай тыйаатыра үбүлүөйдээх тэрээһиннэргэ биир сүрүн күүс буолара саарбаҕа суох.

Соторутааҕыта тыйаатыр Кыыл Уолун үбүлүөйдээх сылыгар анаан, «Вдохновение» («Өрө көтөҕүллүү»)  кэнсиэри көрөөччүлэригэр бэлэх уунна. Эстрада тыйаатырын камернай саалатыгар иккитэ көрдөрүллүбүт кэнсиэр тыйаатыр артыыстарын биирдиилээн толорууларын көрдөрүүнэн уратылаах буолла.

Кэнсиэр РФ уонна СӨ үтүөлээх артыыһа, СӨ норуодунай артыыһа Дмитрий Артемьев С.А.Зверев-Кыыл Уола «Сарсын, сарсын, сарсыарда» тойугунан, алгыһынан саҕаланна. Салгыы  Саина Винокурова, Василий Эверстов,  Дьулуур Андреев, Мария Коротова, Инна Скрыбыкина  уо.д.а. биирдиилээн толорууларын дьоҕус саалаҕа, этэргэ дылы, ытыска ууран олорон көрдүбүт.
Светлана Чирикова уонна Семен Дьяконов Афанасий Соловьев туруоруутугар «Хотугу көстүүлэр» үҥкүүтүн толоруулара тыйаатыр урукку репертуара умнуллубатын, көрөөччүгэ сөбүлэтэрин кэрэһэлиир.

Дьулустаан Никифоров сахалыы ырыаларга кыл төрүт үнүстүрүмүөнүгэр  попуррита, Василина Шарина-Улан хомуска сыыйа тардыыта кэнсиэркэ дьиҥ сахалыы тыыны биэрдилэр.
Үҥкүү тыйаатырын репертуарыгар норуоттар доҕордоһууларын тиэмэтэ хайаан да баар буолар. Саскылана уонна Эдуард Жирковтар «Истиэпкэ көрсүһүү», Сахайаана Сатыбалдиева «Узымчин» монголлуу үҥкүүлэрэ, Сарика Шан «Кабардинка», Николай Павлов «Табуреточка» нууччалыы үҥкүүтэ көрөөччүлэр күүстээх ытыстарын тыаһынан доҕуһуолланна.
Норуоттар икки ардыларынааҕы уонна өрөспүүбүлүкэтээҕи куонкурустар лауреаттара Владимир Боярскай уонна Виктор Винокуров-Дабайаан саха ырыаларыгар попуррилара, ол иһигэр В.Боярскай Валерий Ноев ырыаларыгар попуррита сүрэҕи-быары сөрүүкэттэ.
Аҕа дойду Улуу сэриитигэр Кыайыы 80 сылын бэлиэтээһиҥҥэ бэлэмнэнэн, тыйаатыр сэрии тиэмэтигэр репертуара эмиэ киэҥ. Бүгүҥҥү кэнсиэр Кыайыыга аналлааах нүөмэрдэрин: Семен Кузьмин, Александр Карманов толорууларын, балет артыыстара «Дорога на Берлин» үҥкүүлэрин, кэнсиэр аата да этэринии, өрө көтөҕүллэн көрдүбүт-иһиттибит.
Үҥкүү национальнай  тыйаатырын дууһаны сылаанньытар, сахалыы тыыны иҥэрэр, куту-сүрү уһугуннарар айар үлэтигэр өссө да ситиһиилэри баҕаран, ытыс тыаһа өргө диэри уҕараабата.

Кэнсиэри Бүтүн Арассыыйатааҕы уонна норуоттар икки ардыларынааҕы куонкурустар лауреаттара Василена Шарина-Улан, норуоттаар икки ардыларынааҕы уонна өрөспүүбүлүкэтээҕи куонкурустар дипломаннара Александр Карманов ыыттылар. Сценарий ааптара уонна режиссер -– СӨ үтүөлээх артыыһа Изабелла Егорова.